काठमाण्डौं । कृषि क्षेत्रको व्यावसायिक बिकास गर्ने उद्देश्यले नेपालमा पहिलो पटक बृहद अन्तर्राष्ट्रिय कृषि प्रदर्शनीको आयोजना हुने भएको छ। आगामी फागुन ६ देखी ८ गते सम्म भृकुडीमण्डपमा मेला आयोजना हुने भएको हो।
कृषि विकास मन्त्रालय, कृषि ईन्जिनीयरिङ निर्देशनालय, मिडिया स्पेश सोलुसन, फ्युचरेक्स इन्डिया र कृषि मेसिनरी व्यवसायी संघको संयुक्त आयोजनामा प्रदर्शनी हुन लागेको हो।
प्रदर्शनीमा पशुपंक्षी बिकास मन्त्रालय, कृषि उद्यम केन्द्र, आर एण्ड डि इनोभेटिभ सोलुसन र नेपाल कृषि सहकारी केन्द्रिय संघ सहयोगीको रुपमा रहने आयोजकले जानकारी दिएका छन्।
नेपाल, भारत, मलेसीया, चीन, ताइवान, इटाली, इजराइल, बंगलादेश, जर्मनी, बेलजियम, नेदरल्याण्डसहित १६ देशका दुईसय भन्दा बढी स्टलको सहभागीता रहने यस प्रदर्शनीमा आधुनिक कृषि यन्त्र तथा उपकरणहरु, आधुनिक खेती प्रणाली, डेरी उद्योग, मत्स्यपालन उद्योग, पोल्ट्री उद्योग एवं पशुपालन उद्योग सम्बन्धी विभिन्न प्रविधिहरुको प्रदर्शनी हुनेछ। साथै कृषि, पशुपालन तथा डेरी सम्बन्धी विभिन्न प्राविधिक गोष्ठीहरु पनि संचालन गरिने आयोजकले जनाएको छ।
प्रदर्शनीमा कृषिक्षेत्रलाई सहज र किफायती बनाउन मद्दत पुर्याउने साना औजार, मेसिनदेखि कृषि, डेरी तथा पशुपंक्षीपालन उद्योगमा प्रयोग हुने ठूला ठूला उपकरणहरुको प्रदर्शनीका साथै डेमो पनि देखाइने जनाइएको छ।
नेपालको कृषि क्षेत्रको यान्त्रिकरणमा सहयोग पुर्याउन प्रदर्शनी कोशेढुंगा सावित हुने आयोजक मिडिया स्पेस सोलुसन्सका प्रबन्ध निर्देशक सर्जल भट्टराईले बताए । प्रर्दशनीबाट नेपालको कृषि क्षेत्रलाई उपयुक्त हुने नविनतम प्रविधि तथा सेवाहरुको पहिचान गर्न मद्दत मिल्ने र तीनको प्रयोगद्धारा कृषि उत्पादन बृद्धि भई मुलुकलाई कृषि उपजमा आत्मनिर्भर बन्न टेवा पुग्ने आयोजकले जनाएको छ।
२४ माघ २०७३, ११।००
वि.सं.२०७३ माघ २४ सोमवार ११:४३ मा प्रकाशित
