काठमाण्डौं । नेपाल आयल निगमले उपभोक्ताको माग बमोजिम पेट्रोलियम पदाथको वितरणलाई प्रभावकारी बनाउने भएको छ । इन्धन आपूर्ति बढे पनि उपभोक्ताले सहज रुपमा पेट्रोलियम पदार्थ नपाएको गुनासो बढिरहेका बेला निगमले सामान्य अवस्थामा जस्तै वितरणलाई प्रभावकारी बनाउने भएको हो।
एक दुई दिनभित्रै आपूर्ति पूर्णरुपमा सहज बनाइ उपभोक्तालाई लाइन बस्न नपर्ने गरी प्रट्रोलियम पदार्थ वितरण गरिने विभागका प्रवक्ता मुकुन्दप्रसाद घिमिरेले बताए। गत शुक्रबार यता ठूलो परिमाणमा पेट्रोलियम पदार्थ भित्रिएको छ। शुक्रबार तीन लाख ६० हजार लिटर पेट्रोल र चार लाख ८० हजार लिटर डिजेल भित्रिएको छ। आइतबार पाँच लाख ९३ हजार लिटर पेट्रोल र पाँच लाख दुई हजार लिटर डिजेल आपूर्ति भएको र आज पनि सोही परिमाणमा आपूर्ति हुने घिमिरेको भनाइ छ।
काठमाडौँ उपत्यकामा सामान्य अवस्थामा दैनिक तीन लाख ५० हजार लिटर पेट्रोलियम पदार्थको माग हुँदै आएको छ। शुक्रबार मात्र रक्सौल नाकाबाट दुई हजार किलोग्राम पेट्रोलियम पदार्थ लोड भएको र आज साँझसम्म थप आपूर्ति हुने निगमले जनाएको छ। निगमले पेट्रोलियम पदार्थको आपूर्ति बढेको बताए पनि बजारमा उपभोक्ताले सहज रुपमा इन्धन पाउन भने सकेका छैनन्। रासस
३ फागुन, २०७२, ३.००
वि.सं.२०७२ फागुन ३ सोमवार १५:२५ मा प्रकाशित
