काठमाडौ । सप्तकोशी डेभलपमेन्ट बैंक, लुम्बिनी जनरल इन्स्योरेन्स र कञ्चन डेभलपमेन्ट बैंकको हकप्रद सेयरमा शुक्रबारदेखि आवेदन खुल्ला भएको छ । सप्तकोशीले १३० प्रतिशत, लुम्बिनी जनरल इन्स्योरेन्सले १०० प्रतिशत र कञ्चन डेभलपमेन्ट बैंकले ३० प्रतिशत हकप्रद सेयरको बिक्री खुला गरेका हुन् ।
सप्तकोशी डेभलपमेन्ट बैंक
सप्तकोशी डेभलपमेन्ट बैंकको १३० प्रतिशत हकप्रद सेयरमा असार १३ गतेसम्म कायम रहेका सेयरधनीले मात्र आवेदन गर्न सक्नेछन । बैंकले एक सय रुपैयाँ अंकित मूल्यको २७ लाख ४३ हजार कित्ता हकप्रद जारी गरेको छ । सप्तकोशीको निष्काशन तथा बिक्री प्रबन्धकको काम एनएमबी क्यापिटलले गरेको छ ।
हाल सप्तकोशी डेभलपमेन्ट बैंकको चुक्ता पूँजी २१ करोड १० लाख रुपैयाँ रहेको छ । १३० प्रतिशत हकप्रद जारीपश्चात बैंकको चुक्ता पूँजी ४८ करोड ५३ लाख रुपैयाँ पुग्नेछ ।
लुम्बिनी जनरल इन्स्योरेन्स
लुम्बिनी जनरल इन्स्योरेन्सले १ः१ को अनुपातमा ३९ लाख कित्ता हकप्रद सेयर बिक्री खुला गरेको हो । हकप्रदका लागि लगानिकर्ताले भदौ १ गतेसम्म आवेदन दिन सक्नेछन् । लुम्बिनीको हकप्रदमा असार १२ गतेसम्म कायम रहेका सेयरधनीले मात्र आवेदन दिन सक्नेछन् । यसमा बिक्री प्रबन्धकको काम सीबीआइएल क्यापिटलले गरेको छ ।
लगानीकर्ताले बिक्री प्रबन्धकको कार्यालय डिल्लीबजार काठमाडौ तथा लुम्बिनीको सेयर रजिष्ट्रार एस क्यापिटल लालदरबार काठमाडौबाट पनि आवेदन दिन सक्नेछन् । कम्पनीले सीबीआइएल क्यापिटलमा चेकमात्र र हकप्रद सेयर हक हस्तान्तरण गरी लिएका सेयरधनीको आवेदन एस क्यापिटलबाट मात्र लिने व्यवस्था गरेको छ ।
यसैगरी, सिटिजन्स बैंकको उपत्यका भित्रका ठिमी, कुपन्डोल, बौद्ध र कलंकी शाखा तथा उपत्यका बाहिर बिर्तामोड, विराटनगर, धरान, वीरगंज, नारायणगढ, जनकपुर, बुटवल, पोखरा, नेपालगंज, धनगढी र महेनद्रनगर शाखाबाट आवेदन दिन पाइनेछ ।
कञ्चन डेभलपमेन्ट बैंक
कञ्चन डेभलपमेन्ट बैंकको ३० प्रतिशत हकप्रदमा जेठ ३१ गतेसम्म कायम सेयरधनीले आवेदन गर्न सक्नेछन् । कञ्चनको बिक्री प्रबन्धकमा ग्लोबल आईएमई क्यापिटल लिमिटेड रहेको छ ।
बैंकको हाल चुक्ता पूँजी ३४ करोड ६५ लाख रुपैयाँ रहेको छ । हकप्रद बिक्रीपछि बैंकको चुक्ता पूँजी ४५ करोड चार लाख रुपैयाँ पुग्नेछ ।
प्रकाशित मितिः २०७४ असार ३०
वि.सं.२०७४ असार ३० शुक्रवार १२:४९ मा प्रकाशित
