काठमाडौ। नेपाल यू–१५ साफ च्याम्पियनसीपको उपबिजेतामा सीमित बनेको छ । फाइनल खेलमा नेपाल चीर परिचित प्रतिद्वन्द्वी भारतसँग २–१ ले पराजित हुनपुग्यो ।
सातदोवाटोस्थित एन्फा कम्प्लेक्सको मैदानमा आइतबार सम्पन्न फाइनलमा नेपालले पहिलो हाफमा पेनाल्टीमार्फत अग्रता बनाएको थियो । भारतीय डिफेण्डरले रञ्जन पुनलाई डिबक्सभित्र फल गरेपछि रेफ्रीले नेपाललाई पेनाल्टीको अवसर दिएका थिए । स्ट्राइकर ब्रिजेश चौधरीले पेनाल्टीलाई सदुपयोग गर्दै ४१औं मिनेटमा टोलीलाई अग्रता दिलाएका थिए । पहिलो हाफमा भारतलाई दवावमा राखेको नेपालले सोही लय दोस्रो हाफमा कायम राख्न सकेन ।
५९औं मिनेटमा भारतका लालरोकिमाले गोल गर्दै खेल बराबरीमा ल्याए । ७५औं मिनेटमा भारतले अग्रता लियो । भारतका बिक्रा प्रताप सिंहले अर्काे गोल गरेका थिए ।
नेपालले समूह चरणमा पनि भारतसँग २–१ कै पराजय व्यहोरेको थियो । सेमीफाइनलमा नेपालले बंगलादेशलाई ४–२ र भारतले भुटानलाई ३–० ले हराउँदै उपाधिका लागि आमनेसामने भएका थिए ।
प्रकाशित मितिः २०७४ भदौ ११
वि.सं.२०७४ भदौ ११ आइतवार १७:१२ मा प्रकाशित