काठमाडौं । नेपाल लाइफ इन्स्योरेन्स कम्पनी लिमिटेडले झापाको चन्द्रगढीमा उपशाखा कार्यालय स्थापना गरेको छ । बीमा समितिका निमित्त कार्यकारी निर्देशक श्रीमान कार्कीद्वारा उद्घाटन गरिएको कार्यालयबाट जीवन बीमाको बजार विस्तार र आफ्ना सेवाग्रहीलाई गुणात्मक सेवा उपलव्ध गराउने उद्देश्य रहेको प्रेस विज्ञप्ति मार्फत जानकारी दिइएको छ ।
प्रमुख अतिथि कार्कीले जीवन बीमा क्षेत्रले केही समयदेखि अर्थतन्त्रमा उत्साहजनक योगदान पुर्याइरहेको र यो क्षेत्रले बैंकिङ क्षेत्रसंग स्वस्थ प्रतिस्पर्धा एवं परिपुरक भूमिका निर्वाह गर्दै आएको बताए । उनले उपशाखा कार्यालय स्थापनाबाट स्थानीय स्तरमा बीमितले सेवा प्राप्त गर्ने र बीमा बजारको विकासमा थप सघाउ पुग्ने बताए ।
कार्यक्रममा मन्तव्य व्यक्त गर्दै प्रमुख कार्यकारी अधिकृत विवेक झाले बजार विस्तार रणनीति अन्तर्गत चालु आर्थिक वर्षमा शाखा कार्यालय विस्तारमा जोड दिँदै आएको र प्रतिस्पर्धात्मक वातावरण एवं अग्रणी कम्पनीको नाताले बीमितको सर्वोपरी हितका लागि आवश्यक मापदण्डहरुका बारेमा आम नागरिकलाई जागरुक गराउने उद्देश्य रहेको बताए ।
कम्पनीले चालु आर्थिक वर्ष २०७४÷०७५ को प्रथ त्रैमासिक अवधिमा कुल बीमाशुल्क आम्दानी करिव ३ अर्व ८० करोड रुपियाँ रहेको छ । कम्पनीको खुद नाफा गत वर्षको अवधिको तुलनामा तीन गुणाले बृद्धि भई करिव १७ करोड ७५ लाख रुपियाँ पुगेको जनाइएको छ । यसैगरी कम्पनीको जीवन बीमा कोषमा २६.४७ प्रतिशतले बृद्धि भई करिव ४३.३६ अर्व तथा कुल लगानी करिव ४०.५५ प्रतिशतले बृद्धि भई ५० अर्व रुपियाँ भन्दा बढी हासिल गरेको कम्पनीले जनाएको छ । यसैगरी बीमितलाई ६५ देखि ८२ रुपियाँसम्मको सर्वाधिक बोनसदर प्रदान गरी समग्र जीवन बीमा क्षेत्रमा अग्रणी स्थान हासिल गर्न सफल भएको कम्पनी सचिव ओमप्रकाश पुडासैनीद्वारा जारी विज्ञप्तिमा उल्लेख छ ।
प्रकाशित मिति : ४ मंसिर २०७४
वि.सं.२०७४ मंसिर ४ सोमवार २२:५२ मा प्रकाशित
