काठमाडौ । स्वदेशी लघुवित्त र मिर्मिरे माक्रोफाईनान्सले शतप्रतिशत हकप्रद जारी गर्न धितोपत्र बोर्डमा निवेदन दर्ता गराएका छन् । स्वदेशीले चैत ४ गते एक बराबर एक अनुपातमा ११ करोड ५० लाख रुपैयाँको हकप्रद तथा मिर्मिरेले फागुन ३० गते चार करोड ५० लाख रुपैयाँ बराबरको चार लाख ५० हजार कित्ता हकप्रद जारी गर्न अनुमति मागेको हो ।
स्वदेशीले एनआईसी एशिया क्यापिटल मार्फत हकप्रद निष्काशन गर्नेछ भने मिर्मिरेले हकप्रदको बिक्री प्रबन्धकमा एनआइबिएल एस क्यापिटल नियुक्त गरेको छ । स्वदेशीको शतप्रतिशत हकप्रद पश्चात चुक्ता पूँजी २३ करोड रुपैयाँ पुग्नेछ । साथै मिर्मिरेको शतप्रतिशत हकप्रद पूँजीकरण पश्चात चुक्ता पुँजी ९ करोड रुपैयाँ पुग्नेछ ।
स्वदेकिो सेयरमूल्य प्रतिकित्ता ५९६ रूपैयाँ रहेको छ भने मिर्मिरेको सेयरमूल्य प्रतिकित्ता दुई हजार २७० रूपैयाँ रहेको छ । मिर्मिरेले चालु आर्थिक वर्षको दोस्रो त्रैमासमा एक करोड ४७ लाख रुपैयाँ खुद नाफा आर्जन सहित प्रतिसेयर आम्दानी २९ रुपैयाँ ५ पैसा कायम गरेको छ ।
गत बर्षको नाफाबाट मिर्मिरेले चुक्ता पूँजी चार करोड ५० लाखको ३०.८० प्रतिशत बराबरको एक करोड ३८ लाख ६० हजार रुपैयाँको बोनस सेयर वितरण गरेकाले बोनस पश्चात कम्पनीको पूँजी १० करोड ३८ लाख ६० हजार कायम हुनेछ ।
२०७४ चैत १६ गते प्रकाशित ।
वि.सं.२०७४ चैत १६ शुक्रवार १९:४५ मा प्रकाशित
