काठमाडौं । ऊर्जा मन्त्रालयले सान्जेन र रसुवागढी जलविद्युत् आयोजनाको सेयर पनि जनताको जलविद्युत् कार्यक्रम जारी गरिने भएको छ । बैशाखको पहिलो सातादेखि सर्वसाधारणका लागि जारी गर्न लागिएको शेयरका बिषयमा जानकारी गराउन ऊर्जा मन्त्रालयले १ बजे पत्रकार सम्मेलन आयोजना गर्न लागेको छ ।
यसअघि उक्त आयोजनालाई जनताको जलविद्युत् कार्यक्रम अन्तरगत राखिएको थिएन् । ऊर्जामन्त्री वर्षमान पुनको अध्यक्षतामा हालै बसेकोे जनताको जलविद्युत् संयोजन समितिकोे बैठकले दुवै आयोजनाको एक करोड ५४ लाख कित्ता सेयर जनताको जलविद्युत् कार्यक्रम अन्तर्गत जारी गर्ने निर्णय गरेको थियो ।
प्रधानमन्त्री केपी शर्मा ओलीले फागुन २ गते ‘जनताको जलविद्युत् आयोजना’ कार्यक्रम उद्घाटन गरेका थिए । यस कार्यक्रमका लागि ‘नेपालको पानी जनताको लगानी, हरेक नेपाली विद्युत्को सेयरधनी’ नारा तय गरिएको छ । सबै नेपालीलाई जलविद्युत् आयोजनाको सेयरधनी बनाउने अभियान थालिएको छ । प्रधानमन्त्री ओलीले चैत ७ गते ३७ मेगावाटको त्रिशूली–३ ‘बी’ जलविद्युत् आयोजनाको पहिलो सेयर किनेर जनताको जलविद्युत् कार्यक्रमको सुरु गरेका थिए ।
सरकारले उक्त कार्यक्रममा सघाउ पुर्याउन सबै नागरिकलाई आग्रह गरेको छ । सरकारले यसअघि नै पाँच वर्ष्भित्र १९ आयोजनाबाट तीन हजार चार सय ७९ मेगावाट बिजुली उत्पादन गर्न जनताबाट पैसा उठाउन लागेको बताएको थियो । सोमबार मात्रै १११ मेगावाट क्षमताको रसुवागढी, १४.८ मेगावाटको माथिल्लो सान्जेन र ४२.५ मेगावाटको सान्जेन गरी तीन आयोजना थप गरी कुल २२ आयोजना जनताको जलविद्युत् आयोजना अन्तर्गत सञ्चालन हुने व्यवस्था मिलाएको छ । कार्यक्रम अन्तर्गतका सबै २२ आयोजनाबाट कुल तीन हजार ६ सय ४७ मेगावाट बिजुली उत्पादन हुनेछ । आयोजनामा ५१ प्रतिशत सरकार र ४९ प्रतिशत जनताको पैसा लगानी गरिने ऊर्जा मन्त्रालयको भनाइ छ ।
२०७५ चैत २६ गते प्रकाशित
वि.सं.२०७५ चैत २६ मंगलवार ११:०६ मा प्रकाशित
