जनकपुर । मध्यतराईमा यस वर्ष बोटमा बढी मञ्जरी लागेकाले धनुषामा करिब तीन अर्ब रूपैयाँको आँप फल्ने अनुमान छ ।
जिल्ला कृषि विकास कार्यालयका अनुसार यस वर्ष जिल्लामा दुई हजार २ सय ७१ हेक्टर क्षेत्रफलमा आँपखेती गरिएकामा ३१ हजार ७ सय ९४ मेट्रिक टन उत्पादन हुने अनुमान गरिएको छ । प्रतिकिलो १ सय रूपैयाँमा बिक्री हुने आधारमा सो रकम बराबरको आँप उत्पादन हुने अनुमान कृषि विज्ञले गरेका छन् ।
गतवर्ष जिल्लामा दुई हजार २ सय ५५ हेक्टर क्षेत्रफलमा आँपखेती गरिएकामा २७ करोड ३६ लाख ५० हजार रूपैयाँको पाँच हजार ४ सय ७३ मेट्रिक टन आँप उत्पादन भएको तथ्याङ्क छ । व्यापारीले किसानको खेतमै गएर बगैँचा ठेक्का लिने गरेका छन् ।
सरकारले अत्यधिक आँप उत्पादन हुने लवटोली, यज्ञभुमी, गोदार, भरतपुर, पुष्पवलपुर, धनुषधाम, लक्ष्मी निवास, ढल्केवर, बटेश्वर, भूइँचक्रपुरलगायतका गाउँमा किसानलाई ५० प्रतिशत अनुदानमा आँपको बिरुवा उपलब्ध गराएको थियो ।
यहाँका किसानले बम्बई, माल्दा, कलकतिया, आम्रपाली जातको आँपखेती गर्ने गरेका छन् । उत्पादित आँप स्थानीय बजारसहित काठमाडौँ, पोखरा, नेपालगञ्ज, बुटवल, भैरहवा र सीमावर्ती भारतीय बजारमा बिक्री गरिन्छ । रासस
३ चैत २०७२, ७.००
वि.सं.२०७२ चैत ३ बुधवार १२:१५ मा प्रकाशित
