काठमाडौं । विप्लब समुहले गरेको बन्दको कुरासँगै मकवानपुरमा गाडीमा आगजनी भएको छ ।
आज गएराति हेटौंडा–नारायणगढ सडकखण्ड अन्तर्गत पर्ने मनहरी–९, ज्यामिरेमा बा ५ ख १७३९ नम्बरको ट्रक र मकवानपुरकै फाखेल–हुमाने भञ्ज्याङ्ग सडक खण्डमा बा १४ च ८२३४ नम्बरको कारमा आगजनी गरिएको हो । बन्दको अवज्ञा गरेको भन्दै विप्लव समूहका कार्यकर्ताले गाडीमा आगजनी गरेका हन् । आगजनीका कारण कार पूर्ण रूपमा जलेर क्षति भएको र ट्रकको अगाडिको भाग जलेको जिल्ला प्रहरी कार्यालय मकवानपुरले जनाएको छ ।
यसका साथै आज हेटौंडाका विभिन्न स्थानमा शंकास्पद वस्तु फेला परेको खबर छ । हेटौंडाको मुख्य बजारको पारिजात पथका साथै हेटौंडाका चौकीटोल, थानाभर्याङ, हुप्राचौरको क्विक २० नजिकै फेला परेको शंकास्पद वस्तु सेनाको टोलीले निष्क्रिय पारेको प्रहरीले जनाएको छ ।
काठमाडौं उपत्यका इञ्चार्ज माइला लामालाई प्रहरीले पक्राउ गरेको विरोधमा विप्लव समूहले आज बुधबार बागमती र नारायणी अञ्चलका साथै रामेछाप र दोलखा जिल्ला बन्द आह्वान गरेको हो ।
२०७६ साउन १५ गते प्रकाशित
वि.सं.२०७६ साउन १५ बुधवार ११:१८ मा प्रकाशित
