काठमाण्डौं । ङादी ग्रुप पावर लिमिटेडले सर्वसाधारणका लागि नौं लाख ७३ हजार ७३७ कित्ता साधारण सेयर निस्कासन गर्ने भएको छ । कम्पनीले १०० रुपैयाँ अंकित दरका सेयरहरु चैत २१ गतेबाट निस्कासन गर्न लागेको हो ।
कम्पनीले निस्कासन गर्न लागेको कुल सेयरमध्ये १९४७४ कित्ता कर्मचारी र ४८ हजार ६८६ कित्ता सेयर सामूहिक लगानी कोष कम्पनीहरुलाई छुट्याएको छ । सर्वसाधारणले नौं लाख पाँच हजार ५७७ कित्ताका लागि मात्र आवेदन दिन पाउँछन् । इक्रा नेपालबाट ग्रेड ४ प्लस रेटिङ पाएको कम्पनीको सेयरका लागि न्युनतम ५० कित्ता र अधिकतम ५० हजार कित्तासम्म आवेदन दिन सकिन्छ ।
कम्पनीको सेयर निस्कासन तथा बिक्री प्रबन्धकमा एनआइबिएल क्यापिटल छ । कम्पनीको सेयरका लागि आवेदन फारमा एनआइबिएल क्यापिटलका साथै नेपाल इन्भेष्टमेन्ट बैंकको शाखा कार्यालयहरुमा पाइन्छ । यसका साथै, ङादीको अनामनगर कार्यालयका साथै भिवोर क्यापिटल, ग्रोमोर मर्चेन्ट बैंकर, गुहेश्वरी मर्चेन्ट, एपेक्स डेभलपमेन्ट बैक, सिनर्जी फाइनान्स, काठमाडौं फाइनान्स, साझा विकास बैंक र अरनिको विकास बैंकबाट पनि आवेदन फारम लिन सकिन्छ ।
१२ चैत २०७२, ९.००
वि.सं.२०७२ चैत १२ शुक्रवार ११:१० मा प्रकाशित
