काठमाडौँ । प्रदेश ३ सरकारले जनता आवास निर्माण कार्यक्रम मार्फत चालु आर्थिक वर्षमा २२ हजार ४६ घर निर्माण गर्ने भएको छ ।
प्रदेश ३ को भौतिक पूर्वाधार विकास मन्त्रालयले चालू आर्थिक वर्ष २०७६÷०७७ मा १० जिल्लामा घर निर्माण गर्ने भएको हो ।
उक्त कार्यक्रमका लागि सरकारले ४३ करोड बजेट विनियोजन गरेको भौतिक पूर्वाधार विकास मन्त्रालयका इन्जिनियर सुजन खतिवडाले बताउनुभयो ।
जनता आवास कार्यक्रम अन्तरगत चालू आर्थीक वर्ष भित्रमा मकवानपुरमा ६ सय ५०, चितवनमा ७ सय ६६, सिन्धुपाल्चोकमा ५०, काभ्रेमा ५०, दोलखामा ५०, सिन्धुलीमा ५०, रामेछापमा ५०, नुवाकोटमा २ सय, धादिङमा ३ सय ३० र रसुवामा ५० वटा घर निर्माण गर्ने योजनाका साथ सरकार अगाडी बढेको मन्त्रालयले जनाएको छ ।
संघिय सरकारले प्रदेशलाई जिम्मेवारी हस्तान्तरण गरे पछि प्रदेश सरकारले जनता आवास कार्यक्रमको कार्य्विधि नै बनार कार्यक्रमहरु सञ्चालन गरिरहेको छ ।
मन्त्रालयका अनुसार २०७४ साउन २२ गतेभन्दा अगाडि छनोट भएका लाभग्राहीहरूले आवास कार्यक्रमबाट अनुदान प्राप्त गरेका छन । नेपाल सरकारले गरिब, दलित, लोपोन्मुख, सीमान्तकृत तथा विपन्न नागरिक लक्षित गरी जनता आवास कार्यक्रम ल्याएको हो ।
प्रदेश सरकारले हाल ३ किस्तामा आवास निर्माण रकम उपलब्ध गराउँदै आएको छ । लाभग्राही सूचीमा रहेकाहरूले कुल ३ लाख ५० हजार रकम अनुदान प्राप्त गर्नेछन । जनता आवास कार्यक्रम जनशक्ति अभाव, कार्य्विधि र कर्मचारी हेरफेरले गर्दा पनि प्रभावकारी बन्न सकेको छैन ।
संघ, प्रदेश र स्थानीय तहको संरचनापछि मन्त्रालयले समन्वय गर्ने काम गर्दै आएको आवास निर्माणका इन्जिनियर खतिवडाले बताउनुभयो । भौतिक मन्त्रालयले दिएको जानकारी अनुसार जनता आवास निर्माण कार्यक्रमको कार्य्विधि संशोधन गर्ने तयारी भइरहेको छ ।
२०७६ कात्तिक ०७ गते प्रकाशित
वि.सं.२०७६ कात्तिक ७ बिहीवार १२:५२ मा प्रकाशित
