काठमाण्डौं । डिजेल र मट्टितेलको मूल्य बढाइएको नेपाल आयल निगमले जनाएको छ । आज गएराति १२ बजेदेखि लागू हुने गरी डिजेल र मट्टीतेलको खुद्रा बिक्री मूल्यमा प्रतिलिटर १ रुपैयाँ वृद्धि गरी मूल्य समायोजन गरिएको निगमका निर्देशक तथा प्रवक्ता वीरेन्द्र गोइतले जानकारी दिनुभयो ।
ईण्डियन आयल कर्पोरेशनद्धारा डिसेम्बर १६ मा मूल्य केही बढेर आएले स्वचालित मूल्य प्रणाली कार्यान्वयन कार्यविधि अनुसार मूल्य समायोजन गरिएको जनाइएको छ । निगमले यसअघि गत मङ्सिर १६ गते पनि पेट्रोल, डिजेल र मट्टीतेलको मूल्य बढाएको थियो।
मुल्य बढेसँगै डिजेल र मट्टितेलको खुद्रा विक्री मूल्य प्रति लिटर रू.९८ पुगेको छ भने पेट्रोल, हवाई ईन्धन र एलपी ग्यासको खुद्रा विक्री मूल्य भने यथावत रहेको समेत जनाइएको छ ।
उनका अनुसार मूल्य समायोजन गरेपश्चात नेपालतर्फको वीरगञ्ज नाकाको तुलनामा भारतको रक्सौलमा कायम भएको पेट्रोलको खुद्रा बिक्री मूल्य २० रुपैयाँ ४१ पैसा प्रतिलिटरले सस्तो र डिजेलको खुद्रा बिक्री मूल्य १७ रुपैयाँ १६ पैसा प्रतिलिटरले नेपालतर्फ सस्तो हुन गएको छ ।
२०७६ पुस २ गते प्रकाशित
वि.सं.२०७६ पुस २ बुधवार ११:०७ मा प्रकाशित