कालिकोट । जिल्लाको रास्कोट नगरपालिकाले कोरोनाको महामारी रोकथामका लागि फिल्डमा खटिने स्वास्थ्यकर्मीलाई २ सय प्रतिशत भत्ता दिने निर्णय गरेको छ । महामारी रोकथामका लागि ज्यानै जोखिममा राखेर फिल्डमा काम गर्ने स्वास्थ्यकर्मीलाई प्रोत्साहन गर्न २ सय प्रतिशत भत्ता दिने निर्णय गरेको हो ।
नगरपालिका कार्यपालिकाको बैठकले आफ्नो जीवन नै जाखिममा राखेर दिन रात नागरिकको स्वास्थ्य सेवामा खटिने स्वास्थ्यकर्मीलाई थप हौसला प्रदान गर्नका लागि २ सय प्रतिशत भत्ता दिने रास्कोट नगरपालिका प्रमुख काशीचन्द्र बरालले बताए । नगरपालिकामा निर्माण गरिएका आइसोलेसन कक्ष, हेल्थ डेस्क, ज्वरो मापन केन्द्रमा खटिने स्वास्थ्यकर्मीलाई नियुक्त पदको सुरुको स्केलको २ सय प्रतिशत र क्वारेन्टाइन, ओपिडि र समुदायमा खटिने स्वास्थ्यकर्मीलाई नियुक्त सुरुको स्केलको १ सय प्रतिशत र अन्य स्वास्थ्यकर्मी, कार्यालय सहयोगी र अन्य कर्मचारीलाई सुरुको ५० प्रतिशत भत्ता दिने नगरप्रमुख बरालले बताए । यस्तै नगरले ५० लाखको विपद् व्यवस्थापन कोष पनि स्थापना गरेको छ ।
यस्तै जिल्लाको पचालझरना गाँउपालिका र तिलागुफा नगरपालिकाले कोरोना रोकथामका लागि फिल्डमा खटिने स्वास्थ्यकर्मीको ५ लाखको जीवन बिमा गरिदिने निर्णय गरेका छन् । पचालझरना गाँउपालिका अध्यक्ष खड्गराज सेजुवालले फिल्डमा खटिने स्वास्थ्यकर्मीलाई उत्साहका साथ खटिन र सामाजिक सुरक्षा दिन बिमाको व्यवस्था गर्ने निर्णय गरिएको बताए । उनले भने, ‘हरेक वडामा स्वास्थ्यकर्मीले घर घरमा गएर उपचार गर्नेछन् । स्थ्यकर्मी फिल्डमा खटिँदा सरकार साथमा रहेको महसुस गराउनेछौँ । गाँउपालिकाको सिमानामा राखिएको हेल्थ डेक्समा खटिने स्वास्थ्यकर्मीले गाउँपालिकामा आउने सबैको स्वास्थ्य परीक्षणका साथ तथ्यांक राख्नेछन् । गाँउमा बाहिरबाट आएका व्यक्तिको निगरानी गर्ने व्यवस्था मिलाएका छौँ ।’
यस्तै जिल्लाका अन्य स्थानीय तहले पनि स्वास्थ्यकर्मी लक्षित विभिन्न कार्यक्रम ल्याएका छन् । कतिपय स्थानीय तहले कार्यपालिका बैठक बसेर ल्याउने तयारी गरेका छन् । स्थानीय सरकारले स्वास्थ्यकर्मी लक्षित सहुलियत तथा लाभका कार्यक्रम ल्याएपछि फिल्डमा खटिने स्वास्थ्यकर्मी उत्साहित छन् ।
पचालझरना गाँउपालिका स्थित बदालकोट स्वास्थ्य चौकी इन्चार्ज धर्मराज न्यौपानेले आफूहरूले ज्यानको जोखिम मोलेर सडकमा बिरामी जाँच गर्न लागिरहेका बेला गाँउपालिकाले ५ लाखको बिमा गरिदिने निर्णय गरेपछि थप उत्साह आएको बताए । उनले भने, ‘हामी सरकारले खटाएको ठाउँमा गएर सेवा दिन तयार छौँ । हाम्रो पेशा नै बिरामीको सेवा गर्ने हो । यसबाट भाग्न हामीले मिल्दैन। त्यसमा सरकारले थप हौसला प्रदान गरेकाले धन्यबाद दिन चाहान्छु ।’
वि.सं.२०७६ चैत ३० आइतवार १४:१० मा प्रकाशित
