काठमाडौं । गण्डकी प्रदेशका मुख्यमन्त्री पृथ्वीसुब्बा गुरुङले प्रधानमन्त्री केपी शर्मा ओलीसँग भेटवार्ता गरेका छन् । बिहान करिब १० बजे प्रधानमन्त्री निवास बालुवाटार पुगेका मुख्यमन्त्री गुरुङ र प्रधानमन्त्री ओलीबीच एक्लाएक्लै दुई घण्टा भेटवार्ता भएको हो ।
भेटवार्ताको क्रममा प्रदेशको विकास,आगामी आर्थिक वर्षको बजेट तथा योजनाबारे प्रधानमन्त्री ओलीसँग मुख्यमन्त्री गुरुङले कुरा गरेको मुख्यमन्त्रीका प्रेस संयोजक विक्रम न्यौपानेले जानकारी दिनुभयो ।
त्यस्तै, कोरोना भाइरसको संक्रमण फैलिन नदिन प्रदेश सरकारले गर्न सक्ने कामबारे पनि छलफल भएको न्यौपानेले जानकारी दिनुभयो ।त्यस्तै अरू समसामयिक राजनीतिक विषयमा पनि छलफल भएको उहाँको भनाई छ । नेकपाभित्र विवाद बढिरहेका बेला प्रधानमन्त्री ओली र मुख्यमन्त्री गुरुङबीचको भेटघाटलाई महत्वका साथ हेरिएको छ ।
यसअघि मंगलबार मुख्यमन्त्री गुरुङले आफ्नो फेसबुक लाइभमार्फत नेकपाको विवाद मिलाउन सहयोग गर्ने उद्देश्यका साथ काठमाडौं आएको बताउनुभएको थियो ।
मुख्यमन्त्री गुरुङले बुधबार अर्थमन्त्री युवराज खतिवडालाई भेटी गण्डकी प्रदेशका लागि विभिन्न योजनामा बजेटसमेत माग गर्नुभएको थियो । त्यस्तै, बुधबार नै गुरुङले उपप्रधान तथा रक्षामन्त्री ईश्वर पोखरेल र पार्टीका केही नेतासँग पनि छलफल गर्नुभएको थियो ।
वि.सं.२०७७ वैशाख १८ बिहीवार १४:४८ मा प्रकाशित