काठमाडौं । राष्ट्रिय पुनर्निर्माण प्राधिकरणले भूकम्पपीडितलाई पहिलो किस्ता अनुदान दिन ११ अर्ब ६७ करोड ७९ लाख रुपैयाँ थप रकम निकासा गरेको छ। प्राधिकरणले गोरखा, मकवानपुर, धादिङ, नुवाकोट, सिन्धुपाल्चोक, रामेछाप, काभ्रे, दोलखा, रसुवा, ओखलढुंगा र सिन्धुलीका अनुदान रकम पाउनयोग्य तीन लाख भूकम्पपीडितका उक्त रकम निकासा गरेको हो।
यसअघि प्राधिकरणले अनुदान सम्झौताका लागि झन्डै ९१ करोड ९९ लाख ४२ हजार रुपैयाँ निकासा गरेको थियो। यसअघि र अहिले गरेर प्राधिकरणले आवास अनुदानतर्फ निकासा गरेको रकम १२ अर्ब ५९ करोड ७८ लाख ४२ हजार रुपैयाँ पुगेको छ।
प्राधिकरणका प्रवक्ता रामप्रसाद थपलियाले उक्त रकम ११ जिल्लाका जिल्ला समन्वय समितिद्वारा प्रकाशित सूचीअनुसार बैंकमार्फत उपलब्ध गराइनेछ। भूकम्पपीडितको तथ्यांक संकलनपछि जिल्ला समन्वय समितिबाट नाम प्रकाशित भएका भूकम्पपीडितलाई तीन किस्तामा दुई लाख रुपैयाँका दरले आवास निर्माण सहयोग उपलब्ध गराउने निर्णय सरकारले यसअघि नै गरिसकेको छ। जसअर्न्तगत भूकम्पपीडितले पहिलो किस्ताबापत ५० हजार रुपैयाँ पाउनेछन्।
प्राधिकरणले बैंक र सम्बन्धित जिविसलाई सम्झौता गर्न लगाइ अनुदान सम्झौता भइसकेका परिवारलाई पहिलो किस्ता अनुदान राष्ट्रिय वाणिज्य बैंक र नेपाल बैंक लिमिटेडमार्फत वितरण गर्न अनुरोध गरेको हो।
प्रकाशितः २०७३ वैशाख १८
वि.सं.२०७३ वैशाख १८ शनिवार ११:३४ मा प्रकाशित
