काठमाण्डौँ । भूकम्पले क्षति पुगेको चम्पादेवी मन्दिर पुनःनिर्माण हुने भएको छ । धार्मिक, सांस्कृतिक र ऐतिहासिक महत्व बोकेको चम्पादेवी मन्दिर पुनःनिर्माणका लागि पुरातत्व विभागले रु आठ लाख सहयोग गरेको छ ।
मञ्जुश्रीले तपस्या गरेको चम्पादेवीमा हरेक वर्षको नयाँवर्षमा मेला लाग्ने गर्दछ । यस वर्षको नयाँवर्षमा पनि कीर्तिपुर, पाङ्गा, फर्पिङ, भक्तपुर, ललितपुरका ५० हजार मानिसले चम्पादेवी मेला भर्न आएको चम्पादेवी क्षेत्रसुधार तथा व्यवस्थापन संस्थाका अध्यक्ष जनक तामाङले जानकारी दिनुभयो । उहाँले भन्नुभयो, “धेरै मानिसको रोजाइ र ऐतिहासिक महत्व बोकेको धार्मिकस्थल यस चम्पादेवी भएकाले यसको मर्मत तथा सम्भार गर्नु आवश्यक छ ।”
यस्तै, चम्पादेवी पार्कको निर्माण कार्य पनि भइरहेको छ । सहरी विकास मन्त्रालय जल तथा वातावरण संरक्षण कोषको सहयोगमा उक्त पार्क निर्माण भएको हो ।
२१ बैशाख २०७३, ९।००
वि.सं.२०७३ वैशाख २१ मंगलवार ११:४३ मा प्रकाशित
