काठमाडौँ । पर्यटनको दरिलो आधार मानिने मुलुकको पर्वतीय पर्यटनबाट राज्यले २९ करोड राजस्व कमाएकोछ । गत वर्षको तुलनमा १६ करोड कम भए पनि यसले उत्साह थपेको पर्यटन विभागका महानिर्देशक सुदर्शनप्रसाद ढकालले बताएका छन् ।
उनका अनुसार तुलनात्मक रुपमा यस वर्षको आरोहण नतिजाले उत्साहजनक प्रगति भएको छ । गत वर्ष आरोहण रद्द गरेका टोलीलाई सरकारले दुई वर्षका लागि छुट दिएकाले राजस्वमा केही कमी आएको र यस वर्ष गत वर्ष भन्दा ६४ जना आरोही घटेको उनी बताउँछन् ।
पर्यटन विभाग, पर्वतारोहण शाखाको तथ्याङ्कअनुसार वसन्त ऋतुको यो मौसममा सर्वोच्च शिखर सगरमाथासहितका हिमाल आरोहणका लागि विभिन्न देशका ९७ समूहका एकहजार ४३२ आरोही गएका छन् । तीमध्ये सगरमाथा आरोहणका लागि मात्र ३४ टिम गएका छन् ।
त्यस्तै अन्नपूर्णमा तीन, मनास्लुमा ११, मकालुमा पाँच वाटा टिम आरोहणका लागि गएका छन् । सन् २०१५ मा १०३ टिमका एक हजार ४९६ आरोहीले आरोहण अनुमति लिएका थिए ।
२७ बैशाख २०७३, २.००
वि.सं.२०७३ वैशाख २७ सोमवार १५:४९ मा प्रकाशित
