काठमाडौं । गुराँस लाइफ इन्स्योरेन्स कम्पनी लिमिटेडको शेयर बिक्री खुला भएको छ । कम्पनीको ५ लाख ९० हजार १४ कित्ता शेयर बोलकबोलबाट बिक्री हुन लागेको हो ।
गुराँशले संस्थापक समूहको ३ लाख ३७ हजार ५६५ कित्ता र सर्वसाधारण समूहको २ लाख ५२ हजार ४४९ कित्ता सेयर बिक्री खुला गरेको हो ।
लगानीकर्ताले न्यूनतम १०० रुपैयाँलाई आधार मानेर प्रतिस्पर्धात्मक बोलपत्रमा सहभागी हुन पाउने कम्पनीले जनाएको छ । न्यूनतम १०० कित्ताका लागि आवेदन दिनुपर्नेछ । शेयरको बिक्री प्रबन्धक एनएमबि क्यापिटल लिमिटेड छ ।
अधिकतम १० अंकले भाग जाने संख्यामा वा बिमा समितिले तोकेको प्रतिव्यक्ति सीमाको अधिनमा रहने गरी सम्पूर्ण शेयरका लागि आवेदन दिन सकिने गुराँशले जानकारी गराएको छ ।
आवेदन दिने अन्तिम दिन असोज १९ गतेसम्म छ । यसअघि कम्पनीले २०७७ असार १४ गतेदेखि साउन ४ गतेसम्म हकप्रद सेयर बिक्री खुला गरेको थियो । कम्पनीले आवेदन नपरेको संस्थापक र साधारण सेयर बोलकबोलबाट बिक्री गर्न लागेको हो ।
आवेदन दिन सकिने कार्यालयहरु
लगानीकर्ताले एनएमबि क्यापिटल, नागपोखरी काठमाडौं, एनएमबी बैंकको विराटनगर, झापा, वीरगन्ज, जनकपुर, हेटौंडा, चितवन, पोखरा, बाग्लुङ, बुटवल, नेपालगञ्ज, सुर्खेत, धनगढी महेन्द्रनगरका कार्यालयबाट आवेदन दिन सक्ने कम्पनीले जानकारी दिएको छ । साइन रेसुंगा डेभलपमेन्ट बैंकको दाङ शाखा कार्यालयबाट समेत आवेदन दिन पाइनेछ ।
वि.सं.२०७७ असोज १३ मंगलवार ०९:५५ मा प्रकाशित
