काठमाडौं । चालु आर्थिक वर्षको सात महिनामा अन्तर्राष्ट्रिय विकास सहायता प्रतिबद्धता ७१.५ प्रतिशतले बढेको छ । अर्थ मन्त्रालयका अनुसार गत आवको सात महिनामा १ खर्ब ९ अर्ब २८ करोड रुपैयाँ रहेकोमा चालु आवको सोही अवधिमा १ खर्ब ८७ अर्ब ४३ करोड ६० लाख रुपैयाँ पुगेको छ ।
उक्त प्रतिबद्धतामध्ये अनुदान सहायता ९.७ प्रतिशत र ऋण सहायता ९०.३ प्रतिशत रहेको छ । यस्तै द्धिपक्षीय सहायता ३.३ प्रतिशत र बहुपक्षीय सहायता ९६.७ प्रतिशत रहेको छ । कुल वैदेशिक सहायता प्रतिबद्धतामा सहक तथा सुशासन क्षेत्रमा सबैभन्दा बढी २८.८ प्रतिशत, उर्जा क्षेत्रमा २४.६ र बजेटरी सहायताको रुपमा १२.६ प्रतिशत प्राप्त भएको छ ।
माघ महिनासम्ममा सरकारले ७ अर्ब ४६ करोड अनुदान र २५ अर्ब ३९ करोड ऋण गरी ३२ अर्ब ८५ करोड वैदेशिक सहायता प्राप्त गरेको अर्थ मन्त्रालयले जानकारी गराएको छ । मन्त्रालयका अनुसार सबैभन्दा बढी सडह तथा सुशासनमा ५४ अर्ब रुपैयाँ रहेको छ । यो भनेको समग्र प्रतिद्धताको २८.८ प्रतिशत हो ।
यस्तै दोस्रोमा उर्जा क्षेत्र रहेको छ । उर्जामा ४६ अर्ब १४ करोड ५० लाख रुपैयाँ अर्थात २४.६ प्रतिशत रहेको छ । बजेटरी सहायतामा २३ अर्ब ६८ करोड ४० लाख रुपैयाँ रहेको छ । जम्मा सहायताको १२.६ प्रतिशत बजेटरी सहायतामा रहेको छ । यस्तै सहरी विकासमा १७ अर्ब ७६ करोड ३० लाख र क्षमता विकासमा १७ अर्ब ७६ करोड ३० लाख रुपैयाँ नै रहेको छ ।
मन्त्रालयका अनुसार खानेपानी तथा सरसफाइको क्षेत्रमा ५ अर्ब ८९ करोड ३० लाख, शिक्षामा ४ अर्ब ४६ करोड २० लाख, स्वास्थ्यमा ३ अर्ब ४० करोड २० लाख, वन तथा वातावरणमा १ अर्ब ७५ करोड, कोरोनाको लागि १ अर्ब ३२ करोड ४० लाख र पुनर्निर्माणको लागि ६० करोड रुपैयाँ रहेको छ ।
वि.सं.२०७७ चैत ५ बिहीवार १३:०७ मा प्रकाशित
