काठमाडौं । चालु आर्थिक वर्षको तेस्रो त्रैमाससम्ममा जीवन बीमा कम्पनीहरुले ८० अर्ब ५८ करोड ७५ लाख १२ हजार रुपैयाँ बीमाशुल्क आर्जन गरेका छन् ।
संचालनमा रहेका १९ जीवन बीमा कम्पनीहरुले सार्वजनिक गरेको तेस्रो त्रैमासिक वित्तीय अवस्थाको तथ्याङ्कले यस्तो देखाएको हो । कम्पनीहरुको बीमाशुल्क आर्जन गत वर्षको सोही अवधिको तुलनामा ३७.६० प्रतिशतले बढी हो । गत वर्षको तेस्रो त्रैमाससम्म १९ वटा कम्पनीहरुले ५८ अर्ब ५६ करोड ६१ लाख ९१ हजार रुपैयाँ कुल बीमा शुल्क आर्जन गरेका थिए ।
चैतमसान्तसम्म सबैभन्दा धेरै बीमाशुल्क नेपाल लाइफ इन्स्योरेन्स कम्पनीले गरेको छ । तेस्रो त्रैमाससम्म कम्पनी २५ अर्ब ३७ करोड ४८ लाख ३४ हजार रुपैयाँ बीमाशुल्क आर्जन गरेको थियो ।
कम्पनीले गत वर्षको सोही अवधिको तुलनामा ४५.७७ प्रतिशतले बढी बीमाशुल्क आर्जन गरेको हो । गत वर्षको तेस्रो त्रैमासमा १७ अर्ब ४० करोड ६९ लाख ७२ हजार रुपैयाँ आर्जन गरेको थियो ।
प्रतिशतका आधारमा भने सानिमा लाइफ इन्स्योरेन्स कम्पनीले सबैभन्दा धेरै बीमाशुल्क आर्जन गरेको छ । चालु आवको तेस्रो त्रैमासमा कम्पनीले १ अर्ब ४७ करोड ८२ लाख रुपैयाँ बीमाशुल्क आर्जन गरेको छ । यो शुल्क गत वर्षको सोही अवधिको तुलनामा १५४.२० प्रतिशतले बढी हो । कम्पनीले गत वर्षको तेस्रो त्रैमासमा ५८ करोड १५ लाख रुपैयाँ मात्र बीमाशुल्क आर्जन गरेको थियो ।
चालु आवको तेस्रो त्रैमाससम्ममा दुई कम्पनीको बीमाशुल्क घटेको देखिएको छ । चैतमसान्तसम्म नेशनल लाइफ इन्स्योरेन्स र सन नेपाल लाइफ इन्स्योरेन्सको बीमाशुल्क आर्जन घटेको हो ।
नेशनल लाइफको बीमाशुल्क आर्जन यो वर्ष ८४.३६ प्रतिशतले कमी देखिएको छ । गत वर्षको सोही अवधिमा कम्पनीले ५ अर्ब ७२ करोड ६६ लाख २६ हजार रुपैयाँ आर्जन गरेको थियो । यो वर्षको तेस्रो त्रैमासमा भने ८९ करोड ५४ लाख ९६ हजार रुपैयाँ मात्रै शुल्क आर्जन गरेको छ ।
यस्तै, यो वर्ष सन नेपाल लाइफको बीमाशुल्क आर्जन १६.४६ प्रतिशतले कमी देखिएको छ । गत वर्षको तेस्रो त्रैमासमा १ अर्ब ९४ करोड ७३ लाख ७ हजार रुपैयाँ बीमाशुल्क आर्जन गरेको कम्पनीले यो वर्षको सोही अवधिमा भने १ अर्ब ६२ करोड ६९ लाख ७३ हजार रुपैयाँ आर्जन गरेको छ ।
हेर्नुहोस्, कुनको कति ?
वि.सं.२०७८ जेठ ७ शुक्रवार १६:०० मा प्रकाशित
