काठमाडौं । चालु आर्थिक वर्षको तेस्रो त्रैमाससम्ममा निर्जीवन बीमा कम्पनीले कुल २२ अर्ब ९१ करोड ३० लाख ७६ हजार रुपैयाँ बीमाशुल्क आर्जन गरेका छन् ।
संचालनमा रहेका २० निर्जीवन कम्पनीको १९ वटाले चालु आवको तेस्रो त्रैमासिक वित्तीय विवरण सार्वजनिक गरेका छन् । ती मध्ये नेशनल इन्स्योरेन्स कम्पनीले वित्तीय विवरण सार्वजनिक गरेको छैन ।
कम्पनीहरुको बीमाशुल्क आर्जन गत वर्षको सोही अवधिको तुलनामा २५.१८ प्रतिशतले वृद्धि भएको छ । गत वर्षको चैतमसान्तसम्ममा ति कम्पनीहरुले १८ अर्ब ३० करोड ३७ लाख १० हजार रुपैयाँ बीमाशुल्क आर्जन गरेका थिए ।
चालु आवको तेस्रो त्रैमासम्ममा सबैभन्दा धेरै शिखर इन्स्योरेन्सले २ अर्ब ९६ करोड ५७ लाख ९९ हजार रुपैयाँ बीमाशुल्क आर्जन गरेको छ । यो वर्षको कम्पनीको बीमाशुल्क आर्जन १४ प्रतिशतले बढेको हो । गत वर्षको सोही अवधिमा कम्पनीले २ अर्ब ६० करोड ९ लाख ३३ हजार रुपैयाँ आर्जन गरेको थियो ।
प्रतिशतका आधारमा भने सानिमा इन्स्योरेन्सको उल्लेख्य वृद्धि भएको छ । कम्पनीले गत वर्षको तेस्रो त्रैमासमा ६ करोड ९१ लाख १६ हजार रुपैयाँ बीमाशुल्क आर्जन गरेको कम्पनीले यो वर्षको सोही अवधिमा ७८ करोड ६१ लाख ६६ हजार रुपैयाँ आर्जन गरेको छ ।
तर, प्रभु इन्स्योरेन्सको भने बीमाशुल्क आर्जन यो वर्ष घटेको देखिएको छ । तेस्रो त्रैमाससम्म आउँदा कम्पनीको बीमाशुल्क ४.३१ प्रतिशतले घटेको छ । गत वर्षको सोही अवधिमा १ अर्ब २० करोड ९५ लाख ३४ हजार रुपैयाँ आर्जन गरेको कम्पनीले यस वर्षको तेस्रो त्रैमाससम्ममा १ अर्ब १५ करोड७२ लाख ८७ हजार रुपैयाँ मात्र आर्जन गरेको छ ।
हेर्नुहोस्, कुनको कति ?
वि.सं.२०७८ जेठ ११ मंगलवार १८:२८ मा प्रकाशित