काठमाडौं । नेपाल उद्योग परिसंघ (सिएनआई) ले बुधबार १८ औं बार्षिक साधारणसभा मनायो । कार्यक्रमको प्रमुख अतिथिमा प्रधानमन्त्री शेरबहादुर देउवा हुनुहुन्थ्यो ।
कार्यक्रममा प्रधानमन्त्री नै उपस्थित भएपछि उद्योगी व्यवसायी निकै उत्साहित भएका थिए । सिएनआई पनि धेरै नै उत्साहित बनेको थियो ।
कोरोना महामारीले र्जजर अवस्थाबाट गुज्रिए रहेको अर्थतन्त्रको पुनसंरचना, राहत लगायतका विषयमा केही बोल्नु होला की ? आउँदै गरेको मौद्रिक नीतिका विषयमा वा त्यसमा नीजि क्षेत्रलाई समेटने गरी केही बोल्नु होला की ? केही नीतिगत विषयमा बोल्नु होला की ? भन्ने धेरैको अपेक्षा रहेको थियो । जब प्रधानमन्त्री देउवाले भाषण सुरु गर्नुभयो त्यसपछि सबैका मनमा निरास छाउन थाल्यो । उद्योगी व्यवसायीको मन तथा मुहारमा छाएको निरास खुसीमा परिणत हुन सकेन ।
उहाँले करिब ४ मिनेट गर्नु भएको भाषणमा अधिकांश समय अर्थ मन्त्री जनार्दन शर्माको प्रशंसामा नै बिताउनुभयो । नेपालका अधिकांश नेताहरुले भाषणमा धेरै नै समय खर्च गर्ने र अति नै अनावश्यक भाषण गरेर समय बर्बाद बनाएका कारण मानिस निकै निरास बनेका थिए । त्यही सेरोफेरोमा प्रधानमन्त्री बन्नु भएका देउवा पहिलो पटक भौतिक रुपमा उपस्थित भएर सार्वजनिक कार्यक्रममा जानुभयो, त्यो पनि निजी क्षेत्रको । कोरोनाले नीजि क्षेत्रमा लागेको घाउमा मलम लगाउनु होला की भन्ने धेरैको आशा थियो । फेरी नेपाली काँग्रेस आर्थिक उदारिकरणमा विश्वास गर्ने पार्टी । त्यही पार्टीको सभापति नै प्रधानमन्त्री भएको बेला उहाँबाट धेरै नै आशा रहेको थियो । त्यो आशा पुरा हुन सकेन ।
यस्तो छ प्रम देउवाको मन्तव्य :
बिनोद चौधरीले मेरो जिल्लामा अक्सिजन प्लान बनाउनु भएको छ । उहाँले अरुपनि सहयोग गर्ने बचन दिनु भएको छ । देशमा कोरोनाको समस्या छ । त्यो समस्या समाधान गर्न नेपालका उद्योगपती व्यापारीले सहयोग गर्नु पर्छ भन्ने मेरो धारणा छ र म यहीबाट उहाँहरुलाई आव्हान गर्न चाहन्छु । सरकारको कर्तव्य हो गर्नैपर्छ । साथै तपाईहरुले पनि हातेमालो गर्नुभयो भने हामी छिटै महामारीबाट मुक्त हुनेछौ ।
हाम्रो अर्थमन्त्री जी अत्यन्तै मेहनती हुनहुुन्छ । मलाई विश्वास छ उहाँले नेपालको अर्थतन्त्रलाई छिटै पहिलाको भन्दा माथी उठाउनु हुनेछ । नेपालको आर्थिक अवस्थामा सुधार गर्नुहुनेछ । उहाँले सक्नुहुन्छ । उहाँ एकदमै मेहनती हुनुहुन्छ । उहाँ भिजन पनि भएको व्यक्ति हो । उहाँले बोलेको कुरा सुनेर पनि तपाईले थाहा पाईसक्नु भएको छ । उहाँसँग लगनशिलता छ ।
मैले धेरै कुरा केही भन्नु छैन । मैले बोल्ने कुरा छैन । यहाँ बोलाएर बोल्ने मौका दिनुभयो । त्यसको लागि सिएनआईका हार्दिक धन्यवाद दिनचाहन्छु । अहिले अत्यन्त अप्ठ्यारो अवस्था छ । कोरोनाले दुःख दिइरहेको छ । अर्को भेरियन्ट आउँछ भनेका छन् । त्यसको लागि हामी सबै लागेर अघि बढौ । विकास आवश्यक छ । जिन्दगी बढी आवश्यक छ । जनतासँग पैसा छैन कहाँबाट खोप किन्छन । हामी नि:शुल्क खोप दिन प्रतिबद्ध बनौ । हाम्रो कर्तव्य पनि हो । यहीबाट सबैलाई अनुरोध गर्दैै कोरोनालाई परास्त गरेर अघि बढौ, धन्यवाद ।
वि.सं.२०७८ साउन ६ बुधवार १४:३४ मा प्रकाशित