काठमाडौं । नियामक निकायको प्रमुख भएर पदको दुरुपयोग गर्दै करोडौं रुपैयाँ भ्रष्टाचार गरेको भन्दै नेपाल धितोपत्रका अध्यक्ष भिष्मराज ढुंगानालाई अर्थमन्त्रालयले स्पष्टिकरण सोध्ने भएको छ ।
अर्थ मन्त्रालयका एक उच्च अधिकारीका अनुसार आजै केही समयमा नै बोलाएर ‘तपाईलाई किन कारबाही नगर्ने ?’ भन्दै लिखित स्पष्टिकरण सोध्ने तयारी भएको छ ।
बोर्डका अध्यक्ष ढुंगानाले नियामक निकायको अध्यक्ष भएपछि विभिन्न समयमा करोडौं रुपैयाँ भ्रष्टाचार गरेको देखेपछि मन्त्रालयले स्पष्टिकरण सोध्न लागेको हो ।
उहाँका अनुसार अध्यक्ष ढुंगानाले बोर्डमा गएपछि विभिन्न बाहनामा भ्रष्टाचार गरेको र त्यही पैसाले आफ्न्त तथा साथिभाईको नाममा सेयर किन्ने गरेको पाइएको छ ।
ढुंगानाले पदको दुरुपयोग गर्दै पुँजी बजारको हित विपरित काम गरेको अर्थको तर्क छ । ढुंगानाले कमिशन मागेर हैरान पारेपछि मन्त्रालयका उच्च अकिकारीलाई समेत मौखिक तथा लिखित उजुरी परेका छन् ।
यस्तै अध्यक्ष ढुंगानाले कानून विपरीत सर्वोत्तम सिमेन्टको सेयर छोरीको नाममा राखेको प्रमाणसहित सञ्चार माध्यममा आएपछि अर्थले निकै चासो दिएको छ ।
राष्ट्रपति विद्यादेवी भण्डारीको ठाडो आदेशमा अध्यक्ष भएका ढुंगानालाई अघिल्लो सरकारको पालमा चलाउन अर्थले चासो दिएको थिएन । अहिले अर्थ मन्त्रालय स्वेतपत्रको तयारी तथा बजेटको रिभ्यूमा लागेको समयमा नै अध्यक्षले गरेको वित्तीय अपराधको बारेमा धेरै विषय बाहिर आउन थालेपछि स्पष्टिकरण सोध्न लागेको बताइएको छ ।
अध्यक्ष ढुंगानाले करोडौ रुपैयाँ भ्रष्टाचार गरेको भनेर अख्तियार दुरुपयोग अनुुुन्धान आयोगमा पनि उजुरी परेको छ । उक्त उजुरीको विषयमा अख्तियार भने मौन बसेको छ ।
वि.सं.२०७८ साउन १३ बुधवार ११:४० मा प्रकाशित