काठमाण्डौं । मेगा बैंकले आफ्ना सेयरधनीलाई १३.२५ प्रतिशत बोनस सेयर तथा कर प्रयोजनका लागि ०.७० प्रतिशत नगद लाभांश वितरण गर्ने भएको छ । हिजो आइतबार बसेको बैंक संचालक समितिको बैठकले बोनस वितरण पश्चात ६५ प्रतिशत हकप्रद सेयर बिक्री गर्ने प्रस्ताव समेत गरेको छ ।
बैंकले प्रस्ताव गरेको लाभांस राष्ट्र बैंकको स्वीकृति पश्चात आगामी साधारणसभाले पारित गरेपछि लगानीकर्तालाइ वितरण गरिनेछ ।
बैंकको चुक्ता पूँजी ३ अर्ब २४ करोड रुपैयाँ रहेको छ । केही समय अगाडि मात्र बैंकले २५ प्रतिशत हकप्रद बिक्री गरेको थियो । २५ प्रतिशत हकप्रदपछि बैंकको पूँजी चार अर्ब ५ करोड रुपैयाँ पुगेको छ । त्यसमा १३.२५ प्रतिशत बोनस र फेरि ६५ प्रतिशत हकप्रद बिक्री गरेपछि बैंकको चुक्ता पूँजी ७ अर्ब ५७ करोड रुपैयाँको हाराहारीमा पुग्नेछ ।
बैंकले चालु आर्थिक बर्षको पहिलो त्रैमास अर्थात असोज मसान्तसम्ममा १४ करोड ६९ लाख रुपैयाँ खुद मुनाफा गरेको छ।
२० मंसिर २०७३, ११।००
वि.सं.२०७३ मंसिर २० सोमवार १७:३४ मा प्रकाशित
