काठमाडौं । समुदायमा कोरोना देखिएपछि दमकमा लकडाउन समुदायमा कोरोना संक्रमण देखिएपछि झापाको दमक नगरपालिकाले लकडाउन घोषणा गरेको छ ।
लकडाउन खुकुलो हुँदा कोरोना फैलिएको निष्कर्ष निकाल्दै दमक नगरपालिकाले एक साताका लागि लकडाउन गरिएको दमक नगरपालिकाले जनाएको छ ।
नगरपालिकाको आकस्मिक बैठकले शनिबार रातिदेखि लागुहुन ५ भदौसम्म लकडाउन गर्ने निर्णय गरेको नगरप्रमुख रोमनाथ ओलीले जानकारी दिए ।
लकडाउनमा औषधी र दुग्ध डेरीबाहेक कुनै पनि पसल, उद्योग तथा संघ संस्थाहरू सञ्चालन नहुने ओलीले बताए । ‘डेरी पनि बिहान ६ बजेदेखि ८ बजेसम्म मात्र खुल्न पाउँछ’, उनले भने । यस्तै, नगरपालिकामा लकडाउनको अवधीमा एम्बुलेन्स, सुरक्षाकर्मी, पास भएका सवारी साधन र सञ्चार माध्यमका सवारी साधन मात्र चल्न पाउने छन् ।
मोटरसाइकल तथा सिटीसफारीमा बिरामी बोक्न नपाउने उपप्रमुख गीता अधिकारीले बताइन् । बोक्न परेमा वडाबाट सिफारिस लिनुपर्नेछ । यस्तै, पूर्वपश्चिम राजमार्गमा भने सवारी चल्न पाउनेछन् । तर, उनीहरूलाई दमकमा रोक्न नदिइने अधिकारीले बताइन् ।
यस्तै, दमकमा कोही आएमा अनिवार्य क्वारेन्टाइनमा बस्नुपर्नेछ । दमक आउनैपर्ने भए पूर्वअनुमति लिनुपर्ने उपप्रमुख अधिकारीले बताइन् । दमकमा हालसम्म २१ जनामा कोरोना संक्रमण देखिएको छ । तीमध्ये १४ जना कोरोनालाई जितेर घर फर्किसकेका छन् ।
वि.सं.२०७७ साउन ३१ शनिवार १६:४७ मा प्रकाशित
