चितवन । कोरोना भाइरसको संक्रमण बढ्दै गएपछि पूर्वी चितवनका चार ओटा स्थानीय तहमा निषेधाज्ञा जारी गरिने भएको छ ।
पूर्वी चितवनको रत्ननगर, खैरहनी, कालिका र राप्ती नगरपालिकाका प्रमुख र सुरक्षा निकायसहित आइतवार बसेको संयुक्त बैठकले पूर्वी चितवनको उक्त चार क्षेत्रमा निषेधाज्ञा लागू गर्ने निर्णय गरेको हो ।
राप्ती नगरपालिका प्रमुख प्रभा बरालका अनुसार बैठकले आइतवार राति १२ बजेदेखि लागू हुने गरी एक साताका लागि निषेधाज्ञा जारी गर्ने निर्णय गरेको हो । उनले भनिन् ‘कोरोनाको महामारी फैलिएको छ । अब निषेधाज्ञा जारी नगरे हिँडडुल रोक्न सकिएला जस्तो छैन ।’
प्रमुख जिल्ला अधिकारी नारायणप्रसाद भट्टराईले पूर्वी चितवनका चारओटा नगरपालिकाले संयुक्त बैठक बसेर निषेधाज्ञाको अनुरोध गरेको बताए । यस सँगै प्रशासनले आइतवार नै सूचना जारी गरि निषेधाज्ञा गर्ने भएको छ ।
वि.सं.२०७७ साउन ३२ आइतवार ११:४४ मा प्रकाशित
