काठमाडौं । चालु आर्थिक वर्षको बजेट कार्यान्वयनमा गएको तीन महिना पनि नबित्दै बजेटमार्फत निर्धारण गरेको करका दरमा सरकारले हेरफेर गरेकोे छ ।
सरकारले आलोचना खेप्नुपरेको विद्युतीय गाडीमा यसअघि लगाइएको अन्तःशुल्कसहित विभिन्न करका दरहरू बिहीवार बसेको मन्त्रिपरिषद् बैठकले घटाएको हो । व्यवसायीहरूले विद्युतीय गाडीमा लगाइएको अन्तःशुल्कको विरोध गर्दै आएका थिए ।
विद्युतीय गाडीमा चालु वर्षको आर्थिक ऐनबाट ४० प्रतिशत भन्सार र क्षमताअनुसार ३० प्रतिशतदेखि ८० प्रतिशतसम्म अन्तुशल्क लगाइएको थियो ।
अब भने ३० प्रतिशत अन्तःशुल्क लाग्ने गाडीमा ८० प्रतिशत छुट दिइएको छ । यसैगरी विद्युतीय कारको क्षमताअनुसार छुटका फरकफरक दर कायम गरिएको छ । मन्त्रिपरिषद्को निर्णयअनुसार ५० किलोवाटसम्मका गाडीलाई ८० प्रतिशत छूट दिइएको छ ।
५१ देखि १०० किलोवाटसम्मका गाडीमा लाग्ने अन्तःशुल्कमा ७५ प्रतिशत छुट दिइएको छ भने १०१ देखि १५० किलोवाट क्षमताका गाडीमा ७० प्रतिशत र त्योभन्दा माथिका गाडीमा २५ प्रतिशत अन्तःशुल्क छुट दिने निर्णय भएको अर्थ मन्त्रालय स्रोतले जानकारी दिएको छ ।
विद्युतीय गाडीमा लगाइएको भन्सार दर भने यथावत् राखिएको आजको आर्थिक अभियान दैनिकमा खवर छ ।
वि.सं.२०७७ असोज १६ शुक्रवार ०७:११ मा प्रकाशित