काठमाडौं । आजैदेखि निष्काशन भएको सिंगटी हाइड्रो इनर्जीको आईपीओमा २ लाख ५० हजार ४२५ जना आवेदन दिएका छन् ।
निष्काशन भएको पहिलो दिनमै ४२ करोड ३१ लाख १७ हजार बराबरको ४२ लाख ३१ हजार १७० कित्ताका लागि आवेदन दिएका हुन् ।
कम्पनीले सर्वसाधारणका लागि २६ लाख ९७ हजार कित्ता सेयर ल्याएको हो । यो आईपीओ विक्री प्रबन्धकमा मेगा क्यापिटल मार्केट्स लिमिटेड रहेको छ ।
सर्वसाधारणका लागि छुट्याएको कुल २९ लाख कित्ता आईपीओमध्ये ५८ हजार कित्ता कम्पनीका कर्मचारीहरुका लागि र १ लाख ४५ हजार सामूहिक लगानीकोषको लागि बाँडफाँड गरी बाँकी शेयर सार्वजनिक निष्काशनमा ल्याएको हो ।
आईपीओ छिटोमा चैत १० गते र ढिलोमा चैत २० गतेसम्म आवेदन दिन सकिने छ । आईपीओ खरीदका लागि न्यूनतम १० कित्तादेखि अधिकतम २ लाख कित्तासम्म माग गर्न सकिने व्यवस्था छ ।
वि.सं.२०७७ चैत ६ शुक्रवार १८:१४ मा प्रकाशित
