दोलखा । आगलागीबाट पीडित बनेका कालिञ्चोक गाउँपालिका वडा नम्बर ९ निवासी पर्वत अधिकारीलाई वडा कार्यालयले आर्थिक सहयोग गरेको छ ।
गत बैशाख १ गते आगलागी हुँदा घर तथा चौपाया पूर्ण रुपमा नष्ट भएपछि ९ नम्बर वडा कार्यालयको पहलमा आर्थिक संकलन गरेर अधिकारीलाई २ लाख १४ हजार १ सय ९१ रुपैयाँ हस्तान्तरण गरेको हो ।
आगलागी हुँदा २ वटा घर, २ वटा गाई, लत्ताकपडा तथा खाद्यान्न पूर्ण रुपमा जलेर नष्ट भएको जिल्ला प्रहरी कार्यालयले जनाएको छ । आगलागीबाट ८० लाख रुपैयाँ बरारबको क्षति भएको प्रहरी कार्यालयले जनाएको छ ।
कालिञ्चोक गाउँपालिका ९ नम्बर वडा कार्यालयले समिति बनाएर आर्थिक सहयोग संकलन गरेको थियो । साविकको १ देखि ९ नम्बर वडासम्म समिति सदस्यहरुले आर्थिक संकलन गरेका थिए । सोही संकलित रकम अधिकारीलाइ प्रदान गरिएको हो ।
९ नम्बर वडा अध्यक्ष रामप्रसाद मैनालीले सुन्द्रावतीवासी विपद्मा पर्दा सधैभरी पीडितकै पक्षमा वडा कार्यालय रहेको बताए । यस अघि पनि वडा कार्यालयले ९ नम्बर निवासी शंकर पकुवाललाई पनि ५० हजार रुपैयाँ सहयोग गरेको बताए ।
त्यसैगरी तराईबासी टोर्नाडो नामक हावाहुरीबाट पीडित बन्दा पनि कालिञ्चोक गाउँपालिका ९ नम्बर वडा कार्यालयले १ लाख २ हजार रुपैयाँ आर्थिक सहयोग संकलन गरेर पठाएको अध्यक्ष मैनालीले जानकारी दिए ।
‘आफ्ना नागरिक विपद् तथा अप्ठयारोमा पर्दा वडा कार्यालय सधै साथ दिन्छ,’ अध्यक्ष मैनालीले भने, ‘हामीले दिएको राहतले पीडितको घाउमा थोरै मात्रै मल्हम पट्टी लगाउँन सक्छ ।’
वि.सं.२०७८ वैशाख ७ मंगलवार १५:०० मा प्रकाशित