काठमाडौं । गत आर्थिक बर्ष २०७७-७८ को असार महिनामा मात्र नेपालमा ६ अर्ब २७ करोड ६६ लाख रुपैयाँ बराबरको काँचो सुन आयात भएको छ ।
नेपालमा मासिक ३ अर्ब रुपैयाँसम्मको सुन आयात हुने गरेको थियो । असारमा महिनामा मात्रै २ गुणा भन्दा बढी अर्थात् ६ अर्ब २७ करोड रुपैयाँ बराबरको सुन आयात भएको तथ्याङक विभागले जनाएको छ ।
विभागका अनुसार असारमा ९०६ केजी ५ सय ग्राम काँचो सुन आयात भएको छ । कोरोनाको दोस्रो लहर र त्यसलाई नियन्त्रणका लागि जारी निषेधाज्ञाका कारण गत बैशाखको दोस्रो सातादेखि जेठ मसान्तसम्म सुन आयात ठप्प थियो । असारमा निषेधाज्ञा खुकुलो बनाएसँगै सुन आयात पनि उच्च देखिएको छ ।
गत आर्थिक २०७७-७८ मा कुल २७ अर्ब ३४ करोड ३९ लाख रुपैयाँको ३ हजार ९२४ केजी सुन आयात भएको छ । जुन अघिल्लो आव २०७६-७७ को भन्दा दोब्बर हो । अघिल्लो आवमा १३ अर्ब ४६ करोड रुपैयाँ बराबरको सुन आयात भएको थियो । परिमाणका आधारमा अघिल्लो आवमा २ हजार ४ सय केजी सुन आयात भएको थियो ।
कोरोना महामारी र मूल्य बढ्दा अघिल्लो आवमा सुनको आयात ह्वात्तै घटेको थियो । तर, गत आवमा भने कोरोना महामारीकाबीच पनि सुनको आयात दोब्बर मात्रामा बढेको विभागको तथ्यांकले देखाएको छ ।
कोरोना महामारीका कारण जारी अघिल्लो वर्षको लकडाउनमा सम्पूर्ण पसल व्यवसाय तथा अन्तर्राष्ट्रिय उडानहरु बन्द भएका कारण सुन आयात कम भएको नेपाल सुनचाँदी व्यवसायी महासंघका पूर्व अध्यक्ष मनिरत्न शाक्यले बताउनुभयो ।
‘मान्छेले ज्यान कसरी जोगाउने भन्ने चिन्ता थियो, सुन किनेर कसरी लगाउने’ उहाँले भन्नुभयो ‘मान्छेलाई बिहान बेलुका हात मुख जोडन समेत समस्या भएको बेला सुन लगाउने त कुरै भएन ।’
उहाँका अनुसार गत वर्ष कोरोना केही समय अलि सहज भएकोले माग बढी भएको हो । असार साउन महिना सुन कारोबारको लागि अफसिजन भएकाले व्यापार कम भएको शाक्यले बताउनुभयो । तीज लगायतका चार्डपर्व सुरुभएपछि व्यापार तथा खपत बढ्ने उहाँको अपेक्षा छ ।
गत आर्थिक वर्षमा २५२ केजी सुन बैंकमा रहेको बैंकर्स संघका कार्यकारी प्रमुख अनिल शर्माले बताउनुभयो । व्यापारी र उपभोक्ताको मागअनुसार नै आयात हुने गरेको उहाँको भनाई छ ।
शर्माका अनुसार नेपाल सुनचाँदी व्यवसायी महासंघको सिफारिस तथा माग बमोजिम नै सुन आयात भएको उहाँले बताउनुभयो । बैंकहरुले दैनिक २० केजी सुन आयात गर्दै आएका छन् । गत आर्थिक वर्षमा काँचो सुन आयातबाट सरकारले ३ अर्ब ३३ करोड ५८ लाख ३० हजार रुपैयाँ राजस्व प्राप्त गरेको छ ।
वि.सं.२०७८ साउन १२ मंगलवार १४:१४ मा प्रकाशित