चितवन । राष्ट्रिय सहकारी बैंकले अहिलेको तरलता संकट गहिरीरहदा पनि बचत फिर्ता र कर्जा प्रबाहमा कुनै समस्या नभएको दावी गरेको छ । तरलता अभावको कारण बैंकहरुले कर्जा लगानी रोक्नुको साथै ठुलो रकम सोहि दिन दिन नसकिरहेको बेला सहकारी बैंकले भने बचत फिर्तासँगै कर्जा लगानी समेत गरिरहेको प्रमुख कार्यकारी अधिकृत बद्री गुरागाईको दावी रहेको छ ।
सहकारी बैंक र नेपाल सहकारी समाजको संयोजनमा भएको सहकारी हरुको भ्रमणमा रहेका संचारकर्मिहरुसँग कुरा गर्दै प्रमुख कार्यकारी अधिकृत गुरागाईले तरलता अभावले सहकारीमा कर्जा लिन आउनेहरूको संख्या बढेको बताए। बैंकमा करिब ५० अर्ब निक्षेप रहेको र ३९ अर्ब कर्जा लगानी रहेको जनाएको छ ।
बैंकले सोही बेला विज्ञप्ति जारी गर्दै मंसिर २५ गतेको वित्तीय विवरण अनुसार बैंकको तरलता अवस्था १७.७३ प्रतिशत र कर्जा निक्षेप अनुपात ७८.१६ प्रतिशत ( शेयर पूंजी तथा कोषको रकम बाहेक ) कायम रहेको बताइएको छ ।
नेपाल राष्ट्र बैंकले गरेको व्यवस्था अनुसार सिडि रेसियो ९० प्रतिशतसम्म हुनुपर्छ तर बैंक नियामकीय व्यवस्था भन्दा झण्डै ११ प्रतिशत सहज अवस्थामा रहेको विज्ञप्तिमा उल्लेख गरिएको छ ।
साथै राष्ट्र बैंकले तोकेको न्यूनतम पूंजीकोष अनुपात ८ प्रतिशत हुनुपर्नेमा बैंकको पूजीकोष अनुपात ९.५१ प्रतिशत रहेको र यसले बैंक तरलताको कति सहज अवस्थामा छ भन्ने कुरा स्पष्ट पारेको पनि सिइओ गुरागाईले जानकारी दिए ।
वि.सं.२०७८ मंसिर २६ आइतवार १७:०१ मा प्रकाशित