काठमाडौं । भोलि अर्थात शनिबार विभिन्न तीन कम्पनीको साधारण सभा हुँदैछ । उक्त दिन तीन लघुवित्त कम्पनीले सभा गर्दैछन् ।
शनिबार नेरुडे लघुवित्त, घोडीघोडा लघुवित्त वित्तीय संस्था र सपोर्ट लघुवित्त वित्तीय संस्थाले साधारण सभा गर्न लागेका हुन् ।
नेरुडे लघुवित्त वित्तीय संस्थाले भोलि अर्थात पुस १० गते १५औं साधारणसभा बोलाएको छ । संस्थाले सेयरधनीलाई वितरण गर्ने लाभांश प्रस्ताव पारित गर्न सभा आह्वान गरेको हो ।
सभामा २१.४८ प्रतिशतका दरले बोनस सेयर र कर प्रयोजनार्थ १.१३ प्रतिशत नगद लाभांश वितरण गर्ने विशेष प्रस्ताव पारित हुनेछ । सभा प्रयोजनार्थ लघुवित्तले २६ मंसिरदेखि १० पुससम्म बुक क्लोज गरेको छ ।
जसअनुसार २३ मंसिरसम्म नेप्सेमा कारोबार भई कायम रहेका सेयरधनीले मात्र सभामा भाग लिन तथा लाभांश प्राप्त गर्न सक्नेछन्।
यस्तै, घोडीघोडा लघुवित्तले पनि भोलि छैठौं वार्षिक साधारण सभा गर्दैछ । सभाले आव २०७७/७८ को वार्षिक प्रतिवेदन छलफल गरी पारित गर्ने र आव २०७८/७९ को लागि लेखापरिक्षकको नियुक्ती र निजको पारीश्रमिक निर्धारण गर्ने प्रस्ताव पारित गर्नेछ ।
त्यसैगरी सपोर्ट लघुवित्त वित्तीय संस्थाले पनि भोलि वार्षिक साधारण सभा गर्दैछ । सभामा लाभांश पारित गर्ने मुख्य एजेण्डा रहेको छ ।
सभाले ३० प्रतिशत बोनस सेयर र कर प्रयोजनका लागि १.५८ प्रतिशत नगद लाभांश पारित गर्नेछ । कम्पनीले हाल कायम चुक्तापूँजी ६ करोड ६० लाखको आधारमा उक्त लाभांश वितरण गर्न लागेको हो ।
साथै सभाले गत आर्थिक वर्षको वार्षिक प्रतिवेदन सहितका वित्तीय विवरणहरु पारित गर्नेछ । सभा प्रयोजनका लागि कम्पनीले पुस १ गते एक दिन बुक क्लोज गरिसकेको छ ।
वि.सं.२०७८ पुस ९ शुक्रवार १६:२३ मा प्रकाशित
