काठमाडौं । आईपीओ निष्काशनको तयारीमा रहको सीवाईसी नेपाल लघुवित्त संस्थाले चालु आर्थिक वर्ष २०७८/७९ को दोस्रो त्रैमासमा करिब पौने ६ करोड नाफा कमाएको छ ।
मंगलबार सार्वजनिक गरेको चालु आवको दोस्रो त्रैमासिक वित्तीय विवरण अनुसार कम्पनीले उक्त अवधिमा ५ करोड ८१ लाख ६५ हजार रुपैयाँ नाफा कमाएको हो । जुन गत वर्षको सोही अवधिको तुलनामा भने ६० प्रतिशतले बढी हो । गत वर्षको पुस मसान्तसम्ममा कम्पनीले ३ करोड ६३ लाख ३६ हजार रुपैयाँ नाफा कमाएको थियो ।
उक्त अवधिमा कम्पनीको खुद ब्याज आम्दानी १० करोड ४० लाख ८० हजार रुपैयाँ रहेको छ । कम्पनीले गत वर्षको पुस मसान्तमा भने ६ करोड ७५ लाख २५ हजार रुपैयाँ खुद ब्याज आम्दानी गरेको थियो ।
चालु आवको दोस्रो त्रैमासमा कम्पनीको संचालन मुनाफा २३.२१ प्रतिशतले घटेर २ करोड ८१ लाख २२ हजार रुपैयाँ कायम भएको छ । यो नाफा गत वर्षको सोही अवधिमा भने ३ करोड ३६ लाख २४ हजार रुपैयाँ रहेको थियो ।
कम्पनीको चुक्ता पुँजी ८ करोड २१ लाख ८ हजार रुपैयाँ रहेको छ । कम्पनीले जगेडा तथा कोषमा भने १५ करोड २८ लाख २९ हजार रुपैयाँ राखेको छ ।
उक्त अवधिमा कम्पनीले खराब कर्जा भने घटाएको छ । गत वर्षको पुस मसान्तसम्ममा ४.३७ प्रतिशत रहेको खराब कर्जा यस वर्षको सोही अवधिमा भने घटाएर १.९२ प्रतिशतमा झारेको छ ।
कम्पनीले ३ करोड ९५ लाख ३३ हजार ६ सय रुपैयाँ बराबरको आईपीओ निष्काशनका लागि नेपाल धितोपत्र बोर्डमा निवेदन दिएको छ ।
बोर्डबाट अनुमति पाएपछि कम्पनीले ३ लाख ९५ हजार ३३६ कित्ता आइपीओ निष्काशन गर्नेछ ।
वि.सं.२०७८ माघ ११ मंगलवार ११:१८ मा प्रकाशित