काठमडौं । स्वावलम्बन लघुवित्त वित्तीय संस्थाले चालु आर्थिक वर्ष २०७८/७९ को दोस्रो त्रैमासिक वित्तीय विवरण सार्वजनिक गरेको छ ।
चालु आवको ६ महिनाको अवधिमा कम्पनीले २३ करोड ५१ लाख १६ हजार खुद नाफा गरेको छ । जुन गत वर्षको पुस मसान्तसम्मको तुलनामा भने २७.४२ प्रतिशतले बढी हो । गत वर्षको सोही अवधिमा कम्पनीले १८ करोड ४५ लाख २६ हजार रुपैयाँ नाफा गरेको थियो ।
कम्पनीको खुद ब्याज आम्दानी वृद्धि भएकाले नाफामा बढोत्तरी देखिएको हो । उक्त अवधिमा कम्पनीले खराब कर्जा पनि उठाउन सफल भएको छ ।
उक्त अवधिमा कम्पनीको खुद ब्याज आम्दानी पनि २०.६६ प्रतिशतले वृद्धि भई ७६ करोड ६२ लाख ४७ हजार रुपैयाँ पुगेको छ । कम्पनीको यो आम्दानी गत वर्षको दोस्रो त्रैमाससम्ममा भने ६३ करोड ५० लाख ३० हजार रुपैयाँ रहेको थियो ।
चालु आवको ६ महिनाको अवधिमा कम्पनीको संचालन मुनाफा भने झिनो वृृद्धि भएको छ । गत वर्षको पुस मसान्तसम्मको तुलनामा कम्पनीको यो मुनाफा ०.३१ प्रतिशतले वृद्धि भई २९ करोड ३८ लाख ११ हजार रुपैयाँ पुगेको छ ।
कम्पनीको चुक्ता पुँजी १ अर्ब १२ करोड २१ लाख ७० हजार रुपैयाँ रहेको छ । कम्पनीले जगेडा तथा कोषमा भने १ अर्ब ८० करोड ३ लाख ९३ हजार रुपैयाँ राखेको छ ।
कम्पनीको खराब कर्जा पनि ह्वात्तै वृद्धि भएको छ । गत वर्षको पुस मसान्तको तुलनामा यस वर्षको सोही अवधिमा ३.२४ प्रतिशतले वृद्धि भई ७.२६ प्रतिशत पुगेको छ ।
उक्त अवधिमा कम्पनीको प्रतिसेयर आम्दानी ४ रुपैयाँ ६७ पैसाले घटेर ४१ रुपैयाँ ९० पैसा कायम भएको छ । कम्पनीको यो आम्दानी गत वर्षको पुस मसान्तसम्ममा ४६ रुपैयाँ ५७ पैसा रहेको थियो । कम्पनीको प्रतिसेयर नेटवर्थ २६० रुपैयाँ ४४ पैसा रहेको छ ।
वि.सं.२०७८ माघ २४ सोमवार १०:४२ मा प्रकाशित