काठमाडौं । अपर तामाकोशी हाइड्रोपावर कम्पनी पौने दुई अर्ब नोक्सानीमा देखिएको छ ।
कम्पनीले सार्वजनिक गरेको गत आर्थिक वर्ष २०७८/७९ को चौंथो त्रैमासिक वित्तीय विवरणले यस्तो देखाएको हो ।
अघिल्लो आवमा ५ करोड ३४ लाख नोक्सानीमा रहेको कम्पनीले गत आवमा भने ह्वात्तै बढेको छ । गत आवमा कम्पनी १ अर्ब ८७ करोड ३९ लाख रुपैयाँ नोक्सानीमा देखिएको छ ।
वित्तीय खर्च बढेपछि कम्पनीको नोक्सानी पनि वृद्धि भएको हो । गत आवमा कम्पनीको वित्तीय आम्दानी पनि ऋणात्मक देखिएको छ । जसका कारण कम्पनीले नोक्सानी व्यहोरेको हो ।
गत आवमा कम्पनीको वित्तीय आम्दानी ५ अर्ब ६२ करोड ८२ लाख ७७ हजार रुपैयाँ ऋणात्मक रहेको छ ।
गत आवमा कम्पनीले विद्युत बिक्रीबाट भने ७ अर्ब १७ करोड ३५ लाख ८७ हजार रुपैयाँ आम्दानी गरेको छ ।
कम्पनीको चुक्ता पुँजी १० अर्ब ५९ करोड रुपैयाँ रहेको छ । कम्पनीको जगेडा तथा कोषमा पनि २ अर्ब ७१ करोड ७९ लाख ८६ हजार रुपैयाँ ऋणात्मक देखिएको छ ।
गत आवमा कम्पनीको प्रतिसेयर आम्दानी १७ रुपैयाँ ६९ पैसा ऋणात्मक रहेको छ भने प्रतिसेयर नेटवर्थ ७४ रुपैयाँ ३३ पैसा धनात्मक देखिएको छ ।
वि.सं.२०७९ साउन ३१ मंगलवार ११:०७ मा प्रकाशित