काठमाडौं । साउन १८ गतेदेखि सर्वसाधारणका लागि आइपीओ निष्कासन गरेको अप्पर लोहोरे खोला हाइड्रोपावरको आईपीओमा १ अर्ब ५१ करोड ३२ लाख २१ हजार रुपैयाँ बराबरको आवेदन परेको छ ।
कम्पनीको आईपीओमा साउन २२ गते सोमबार अन्तिम दिन साँझसम्म १३ लाख ४३ हजार २६ जनाले १ करोड ५१ लाख ३२ हजार २१० कित्ताका लागि आवेदन दिएका हुन् । यो सर्वसाधारको लागि बिक्री खुला गरिएको कित्तालाई आधार मान्दा ७.७४ गुणा बढी हो ।
मागभन्दा बढी आवेदन परेकै कारण यो आईपीओ गोलाप्रथाबाट बाँडफाँड गरिनेछ। गोलाप्रथाबाट १ लाख ९५ हजार ३२७ जनाले १०/१० कित्ताका दरले सेयर पाउनेछन् । साथै, सोहि मध्यका ९ जनाले थप १/१ कित्ता गरी ११ कित्ता सेयर पाउनेछन् ।
कम्पनीले जारी पूँजी ५० करोड ९८ लाख ४ हजार रुपैयाँको ३९ प्रतिशत अर्थात १९ लाख ८८ हजार २३६ कित्ता साधारण शेयर सर्वसाधारणमा निष्काशनका लागि छुट्याएको थियो। सोमध्ये १ लाख ९८ हजार ८२४ कित्ता साधारण शेयर नेपाल सरकारको सम्बन्धित निकायबाट श्रम स्वीकृती प्राप्त गरी विदेशमा रोजगार गरी रहेका नेपालीहरुका लागि निष्काशन गरी बाँडफाँड गरिसकेको छ भने ३९ हजार ७६५ कित्ता शेयर कर्मचारीहरुका लागि र ९९ हजार ४१२ कित्ता शेयर सामूहिक लगानी कोषहरुका लागि छुट्याएको छ। कम्पनीले आयोजना प्रभाविन क्षेत्रका बासिन्दाहरुका लागि निष्काशन गरेको शेयरमा आवेदन नपरेको कुल १९ लाख ५३ हजार २७९ कित्ता शेयर सर्वसाधारणका लागि निष्काशन गरेको हो।
वि.सं.२०८० साउन २३ मंगलवार १८:१७ मा प्रकाशित
