काठमाडौं । हिमालयन रिइन्सुरेन्स कम्पनीले प्रिमियममा आइपीओ जारी गर्न लागेको विषयविरुद्ध परेको रिट निवेदनमा उच्च अदालत पाटनले अन्तरिम आदेश दिन अस्वीकार गरेको छ ।
मंगलबार न्यायाधीशद्वय जनक पाण्डे र पुरुषोत्तमप्रसाद ढकालको संयुक्त इजलासले यस मुद्दामा अन्तरिम आदेश दिनु नपर्ने ठहर गरेको हो । यो सँगै कम्पनीलाई प्रिमियम मूल्यमा आइपीओ ल्याउन बाटो खुला भएको छ ।
हिमालयन रिको प्रिमियम आईपीओ रोक्न माग गर्दै हरि प्रसाद केसीले रिट दायर गरेका थिए । उच्च अदालतले न्यायोचित कारण र मागदावी नदेखेपछि आईपिओ रोक्न अन्तरिम आदेश नदिएको हो ।
कम्पनीले भोलि मंसिर २७ गतेबाट सर्वसाधारणका लागि प्रिमियम मूल्यमा आइपीओ बिक्री खुला गर्दैछ । यसअघि कम्पनीले पहिलो चरणमा वैदेशिक रोजगारीमा रहेका नेपालीका लागि आइपीओ बिक्री जारी गरिसकेको छ ।
वि.सं.२०८० मंसिर २६ मंगलवार २०:३५ मा प्रकाशित