काठमाडौं । नेपाल राष्ट्र बैंकले बिहीबार विदेशी विनिमय कारोबार गर्न इजाजत पत्र प्राप्त निकायहरुलाई जारी परिपत्र–२०७९ संशोधन गर्दै विदेशी मुद्रा सटही सुविधा बढाएको छ।
नयाँ संशोधित व्यवस्था अनुसारअब उच्च शिक्षा हासिल गर्न जाने नेपालीहरूका लागि क्यानडा, संयुक्त राज्य अमेरिका, अस्ट्रेलियालगायत युरोपेली मुलुकहरुका लागि १२ हजार अमेरिकी डलरसम्मको सटही सुविधा उपलब्ध गराउने राष्ट्र बैंकले जनाएको छ । यसअघि विद्यार्थीहरुलाई १० हजार डलरसम्मको सटहीको सुविधा दिइएको थियो ।
यसका साथै राष्ट्र बैंकले वैदेशिक रोजगारीमा जाने नेपाली नागरिकलाई राहदानी बापत प्रदान गरिने सटही सुविधाको दायरा समेत बढाएको छ । बैंकले जापान,दक्षिण कोरिया,युरोप महादेश,अमेरिका र क्यानडामा रोजगारीका लागि जाने कामदारलाई राहदानी बापत अधिकतम ५०० डलरको सटही सुविधाको व्यवस्था गरेको छ ।
यसअघि यस्तो सुविधा २०० डलर थियो । जापान,दक्षिण कोरिया,युरोप महादेश,अमेरिका र क्यानडा बाहेकका मुलकमा जाने कामदारको हकमा भने यो सिमा २०० डलर तोकिएको छ ।
वि.सं.२०८० पुस १२ बिहीवार १८:२८ मा प्रकाशित