काठमाडौं । अर्थसचिव मधुकुमार मरासिनीले राजस्वमा कमी आइरहेको स्वीकार गरेका छन् । संसदको लेखा समितिको आइतबार भएको छलफलमा उनले पछिल्लो समयमा सरकारको लक्ष्य अनुसार नभई राजस्व संकलनमा गिरावट आएको स्वीकारेका हुन् ।
सरकारले चालु आर्थिक बर्षको लागि ११ खर्ब ८० अर्ब रुपैयाँ राजस्व संकलनको लक्ष्य राखेको भएपनि चालु आर्थिक बर्षको ६ महिना वित्तिसक्दा जम्मा ३९.९३ प्रतिशत अर्थात ४ खर्ब ७१ अर्ब रुपैयाँ मात्र संकलन गरेको छ महालेखा नियन्त्रणको कार्यालयले देखाएको छ ।
त्यस्तै उनले पुँजीगत खर्च कम हुनुमा ‘बजेट होलिडे’ र मन्त्रीपरिषद्को विस्तारमा भएको ढिलाई मुख्य कारण रहेको पनि जिकिर गरे । उनले भने, ‘हामीले समयमा नै मन्त्रीपरिषद् विस्तार गरेर बजेटको कार्यान्वयनमा गएको भए अहिले पुँजीगत खर्च राम्रो गतिमा अगाडी बढ्थ्यो तर ति सवैकाम समयमा हुन सकेनन् । जसको असर पुँजीगत खर्चमा पर्यो ।’
सरकारले पुस २४ गतेसम्म जम्मा ९.२१ प्रतिशत पुँजीगत खर्च गरेको छ । चालु आर्थिक बर्षको लागि सरकारले ४ खर्ब ३९ अर्ब ६५ करोड रुपैयाँ पुँजीगत खर्चका लागि छुट्याइएको छ।
त्यस्तै अर्थसचिव मरासिनीले चालु आर्थिक बर्षमा १ अर्ब ८२ करोड रुपैयाँ बराबरको १५५ केजी सुन भन्सारमा यात्रुहरुको दुरुपयोग भइ ल्याएको सुन समातिएको बताए । सो सुनबाट सरकारले १४ करोड ७० लाख रुपैयाँ राजस्व उठाएको पनि दावी गरे ।
वि.सं.२०७८ पुस २५ आइतवार १४:१७ मा प्रकाशित
