काठमाडौं । आउँदो फागुन ४ गतेदेखि राष्ट्र उत्थान लघुवित्त वित्तीय संस्थाले आईपीओ निष्काशन भएको छ ।
कम्पनीले ८ करोड ५० लाख रुपैयाँ बराबरको ८ लाख ५० हजार कित्ता आईपीओ निष्काशन तथा बिक्री खुला गर्न लागेको हो ।
कम्पनीले निष्काशन गर्न लागेको कुल ८ लाख ५० हजार कित्ता सेयरमध्ये १३ हजार कित्ता कर्मचारीहरुलाई, ४२ हजार ५०० कित्ता सामूहिक लगानी कोषहरुलाई सुरक्षित गरेको छ । भने बाँकी ७ लाख ९४ हजार ५०० कित्ता सर्वसाधारणका लागि छुट्याएको छ ।
उक्त आईपीओ छिटोमा फागुन ८ गते र माग बमोजिम आवेदन नपरेको खण्डमा फागुन १८ गतेसम्म आवेदन दिन सकिने कम्पनीले जनाएको छ ।
कम्पनीका अनुसार उक्त आईपीओमा न्यूनतम १० कित्ता र अधिकतम १ हजार कित्तासम्मका लागि आवेदन दिन सकिनेछ ।
आईपीओ निष्काशन तथा बिक्री प्रवन्धक एनआईबिएल एस क्यापिटल लिमिटेड रहेको छ ।
कस्तो छ त वित्तीय अवस्था ?
कम्पनीले चालु आर्थिक वर्ष २०७८/७९ को दोस्रो त्रैमासमा ३ करोड ६८ लाख ८० हजार रुपैयाँ नाफा कमाएको छ । जुन गत वर्षको सोही अवधिको तुलनामा भने १४८.८६ प्रतिशतले बढी हो । गत वर्षको पुस मसान्तसम्ममा कम्पनीले १ करोड ४८ लाख १९ हजार रुपैयाँ नाफा कमाएको थियो ।
चालु आवको पुस मसान्तसम्म कम्पनीको खुद ब्याज आम्दानी पनि ५७.७२ प्रतिशतले वृद्धि भई ११ करोड २२ लाख ६९ हजार रुपैयाँ पुगेको छ । गत वर्षको सोही अवधिमो कम्पनीका यो आम्दानी ७ करोड ११ लाख ८० हजार रुपैयाँ मात्र रहेको थियो ।
उक्त अवधिमा कम्पनीको संचालन मुनाफा ५ करोड ७३ लाख १७ हजार रुपैयाँ रहेको छ । गतवर्षको पुस मसान्तसम्ममा कम्पनीको यो नाफा २ करोड २७ लाख ३१ हजार रुपैयाँ मात्र रहेको थियो ।
कम्पनीको चुक्ता पुँजी १७ करोड ५० लाख रुपैयाँ रहेको छ । कम्पनीले जगेडा तथा कोषमा भने १५ करोड ४८ लाख ८६ हजार रुपैयाँ राखेको छ ।
उक्त अवधिमा कम्पनीले खराब कर्जा पनि घटाएको छ । गत वर्षको पुस मसान्तसम्म २.५५ प्रतिशत रहेको खराब कर्जा यस वर्षको सोही अवधिमा भने १.०३ प्रतिशतमा झारेको छ ।
वि.सं.२०७८ माघ २५ मंगलवार १३:५९ मा प्रकाशित
