काठमाडौं । नेपाल राष्ट्र बैंकले सुनचाँदी तथा अन्य धातु खरिद, टकमरी र बिक्री सम्वन्धी कार्यविधि, २०७५ मा संशोधन गरेको छ ।
संशोधित व्यवस्था अनुसार खण्ड (ख) बमोजिम गणना गरिएको आधार मूल्यमा टकमरी गर्दाको जर्ती लगायतको लागत बापत प्रति ग्राम तीन सय रुपैयाँका दरले रकम थप गरि असर्फीको दैनिक बिक्री मूल्य निर्धारण गर्ने भएको । यसअघि प्रति ग्राम दुई सय रुपैयाँमा निर्धारण भएको थियो ।
यस्तै, सर्वसाधारण बाहेक नेपाल सरकारका निकाय वा निजी तथा सार्वजनिक संघ÷संस्थाहरुबाट असर्फी खरिदका लागि माग भइ आएमा असर्फीको मौज्दात, माग गर्ने संस्थाको आवश्यकता तथा औचित्यका आधारमा बिक्री गर्न सकिने राष्ट्र बैंकले जनाएको छ ।
यसरी बिक्री गर्दा खण्ड (ख) बमोजिमको आधारमा मूल्यमा जर्ती लगायतको लागत बापत प्रति ग्राम पाँच सय रुपैयाँ थप गरि बिक्री मूल्य निर्धारण गर्ने व्यवस्था गरेको छ ।
यसअघिको कार्यविधिमा भने प्रति ग्राम तीन सय रुपैयाँ थप गरि बिक्री मूल्य निर्धारण गर्ने व्यवस्था रहेका थियो।
वि.सं.२०७९ असार ९ बिहीवार १६:४३ मा प्रकाशित
