काठमाडौ । उद्योगमन्त्री नवीन्द्रराज जोशीले नयाँ उद्योगलाई प्राथमिकता दिएमात्र मुलुकको विकास हुने बताएका छन् ।
घरेलु तथा साना उद्योग विकासको अवलोकन गर्दै मन्त्री जोशीले मुलुकको मागअनुसारको उद्योगलाई प्राथमिकता दिएमात्र बेरोजगार युवा विदेश पलायन हुनबाट रोकिने बताए ।
“परम्परागत उद्योगभन्दा अहिले मुलुकले खोजेको र छिट्टै आम्दानी हुने उद्योग सञ्चालन गर्नका लागि विभागले पहल गर्नुपर्छ ।” मन्त्री जोशीले भने । विभागको संरचनालाई व्यवस्थित गरेर सकारात्मक सोचबाट अगाडि बढे सफलता हासिल गरिने उनको भनाई थियो ।
घरेलु तथा साना उद्योग विभागलाई ७५ वटै जिल्लामा विस्तार गर्नु आवश्यक रहेको मन्त्री जोशीको भनाई थियो ।
उद्योग मन्त्रालयका सचिव शङ्करप्रसाद कोइरालाले मुलुकमा भएका स्रोत साधनको उपयोग गरेमात्र जीविकोपार्जनमा सहज हुने भन्दै गलत काम गर्नेलाई दण्डित र राम्रो काम गर्नेलाई मन्त्रालयको सहयोग रहने स्पष्ट पारे ।
विभागका महानिर्देशक नारायणप्रसाद विडारीले अहिले मुलुकभर दुई लाख ६५ हजार उद्योग रहे पनि दुई लाख तीन हजार उद्योगले मात्र नवीकरण गरेको जानकारी गराएका थिए । विभागले आगामी वर्ष १५ हजार युवालाई युवा उद्यमशिलता तालिम दिने योजना बनाएको उनले सुनाए । विडारीले स्वदेशमा रहेको शक्तिलाई विदेश पलायन हुनबाट रोक्न तालिमबाट सहयोग पुग्ने बताए ।
प्रकाशित मितिः २०७३ भदौ १३
वि.सं.२०७३ भदौ १३ सोमवार २०:३४ मा प्रकाशित