कञ्चनपुर । डिभिजन सडक कार्यालय कञ्चनपुरले तोकिएको समयमा निर्माण कार्य पूरा नगर्ने ११ निर्माण कम्पनीलाई कारवाही गरेको छ ।
कारवाहीमा परेका ११ निर्माण कम्पनीबाट हर्जाना स्वरुप २ करोड ११ लाख ६६ हजार असुल गरिएको डिभिजन सडक कार्यालयले जानकारी दिएको छ । पहिलो चरणमा कारवाही स्वरुप हजर्ना लिएको कार्यालयले थपिएको म्यादभित्र पनि काम सम्पन्न नगरे धरौटी जफत गरेर, ठेक्का रद्द गरी कालो सूचीमा राखिने चेतावनी समेत दिएको छ ।
डिभिजन सडक कार्यालय कञ्चनपुरले कैलाली र कञ्चनपुरमा काम निर्माणाधीन अवस्थामा रहेका साना र ठूला गरी ५४ वटा पुलमध्ये ९ वटा पुल निर्माण सम्पन्न भएको जनाएको छ ।
डिभिजन सडक कार्यालय अन्तर्गत निर्माण भइरहेका फुलवारी खोली पुल, ओदाल खोला पुल, खग्रौला खोला पुल र सन्तोषी खोला पुलका साथै इन्द्रवती वन समुदाय पिपल चौतारा हुँदै भारतीय सीमाना, बसै–फटइ–मटिया–बन्दा ताल बेलौरी, चिसापानी–मंगलसेन लगायतका सडकको तोकिएको समय सकिँदा समेत निर्माण सम्पन्न नहुँदा अलपत्र अवस्थामा छन् ।
वि.सं.२०७६ साउन २२ बुधवार १६:४३ मा प्रकाशित