बिक्रम सुनार, काठमाडौं । संसारभर छरिएर रहेका गैर आवासीय नेपालीहरु नयाँ नेतृत्व छान्नका लागि काठमाडौंमा भेला भएका छन । करिव १५ सयको संख्यामा प्रतिनिधिमुलक उपस्थित भएका नेपालीहरु यतिवेला आफ्नो नेतृत्वमा कस्तो व्यक्ति ल्याउने भनेर छलफलमा व्यस्त छन ।
नयाँ नेतृत्वका लागि हुने निर्वाचनमा वर्तमान उपाध्यक्षद्वय कुमार पन्त र कुल आचार्यले प्यानल नै बनाएर चुनावी मैदानमा उत्रिएका छन । दुवै प्यानल आफ्नो जित सुनिश्चित रहेको भन्दै मतदातासामु मत मागिरहेका छन ।
चुनावी प्रतिष्पर्धामा उत्रिएका पन्त र आचार्य कसले बाजी मार्ला भनेर यतिवेला दरवारमार्ग र ठमेल आसपासमा व्यापक चर्चा चलिरहेको छ ।
संस्थापक सदस्य हुँदै युरोप संयोजक, महासचिव र दुई कार्यकाल उपाध्यक्षको जिम्मेवारी संहालिसकेका पन्त र युरोप संयोजक, केन्द्रीय सदस्य हुँदै गत महाधिवेशनबाट उपाध्यक्षमा निर्वाचित भएका आचार्यविच हुने भिडन्त निकै रोचक मानिएको छ ।
कम्युनिष्ठ पृष्ठभूमिका पन्त र कांग्रेसी पृष्ठभूमिका आचार्यले छुट्टाछुट्टै प्यानलसहित प्रतिष्पर्धामा उत्रिएका छन । आचार्यलाई नेपाली कांग्रेस पार्टीले आधिकारिक उम्मेदवार बनाउँदै केन्द्रीय नेताहरु मत माग्न व्यस्त छन् । कांग्रेस पृष्ठभूमिका गैरआवसीय नेपालीले संघलाई राजनीतिकरण नर्गन भन्दै नेताहरुको कार्यशैलीप्रति आपत्ति जनाएका छन ।
तर, पन्त भने संघलाई साझा फुलवारी बनाउने भन्दै सवैलाई समेटेर आफ्नो प्यानल अगाडि सारेका छन । उनी कतै खुलेका छैनन् । पन्तले प्यानलमा सबै विचारधारा र समावेशी उम्मेदवार छनोट गरेका छन । पन्तलाई क्रियाशिलता र लगनशिलताका आधारमा अधिकांश कांग्रेस पृष्ठभूमिका मतदाताले समेत रुचाएका छन ।
सर्वपक्षीय र समावेशी टिमको नेतृत्व गरेका पन्तको प्यानलले जीत हासिल गर्ने अधिकांश मतदाताले अनुमान गरेका छन । विभिन्न देशमा छरिएका नेपालीलाई संगठित गर्दै राष्ट्रिय समन्वय परिषद स्थापना र सञ्चालनमा समन्वय, निष्क्रिय र समस्याग्रस्त एनसीसीहरुलाई सक्रिय बनाउन सफल भूमिका खेलेका कारण पनि उनी विश्वभरिका एनआरएनमाझ परिचित छन ।
नेपालमा एनआरएनमैत्री नीति, नियम र संविधान बनाउन, लगानीको वातावरण निर्माण तथा सहजीकरण, संसारभरिका एनआरएनलाई स्वदेशमा आर्थिक–बौद्धिक लगानी एवं परोपकारी कार्य गर्न प्रोत्साहित गर्ने अभियानमा पनि सक्रिय रहँदै आएका छन ।
अघिल्लो पटक नै अध्यक्ष हुन योग्य पन्त उपाध्यक्षमा दोहोरिएर हालको नेतृत्वलाई सघाउँदै एनआरएनएलाई संस्थागतरुपमा बलियो लागिपरेका कारण पनि उनीमाथि अधिकांश मतदाताको सहानुभुति रहेको एनआरएनए अमेरिकाका उपाध्यक्ष कृष्णजिवी पन्तले बताउनुभयो ।
भूकम्प लगायत नेपालमा बाढी, पहिरो, आँधीजस्ता प्राकृतिक विपत्तिका बेला राहत, उद्धार, पुनःनिर्माण लगायत परोपकारी कार्यको संयोजन गरी आफै कार्यक्षेत्रमा समेत खटिएका थिए ।
स्वदेशलाई समृद्ध बनाउने अभियानको साझेदार गैरआवासीय नेपाली बन्नुपर्छ भन्ने मान्यताका साथ पन्त एनआरएनको रु. १० अर्बको सामूहिक लगानी कोषलाई मूर्तरुप दिने अभियानमा सक्रिय छन ।
संसारभरका छरिएर रहेका नेपालीविच चिरपरिचित पन्तले आफ्नो १९ बुँदे प्रतिवद्धतासमेत सार्वजनिक गरेका छन ।
प्रतिवद्धता पत्र
१) स्वदेशको विकास र समृद्धिका लागि सम्पूर्ण गैरआवासीय नेपालीको सामूहिक र व्यक्तिगत लगानी भित्र्याउन सक्रिय रहनेछु । सानोदेखि ठूलो लगानीलाई अभियानमा समाहित गरी १० अर्बको सामूहिक लगानी कोषलाई मूर्तरुप दिनेछु । नेपाल सरकारकोसमेत लगानी रहने यस कोषले पूर्वाधार निर्माण लगायत विविध क्षेत्रमा लगानी गर्नेछ ।
२) विदेशमा सिकेको ज्ञान, सीप र प्रविधि नेपाल भित्र्याउने वातावरण बनाउन नवीन पहलहरु अघि बढाउनेछु । गत वर्ष मेरै संयोजकत्वमा काठमाडौँमा सम्पन्न पहिलो विज्ञ सम्मेलनका निष्कर्ष कार्यान्वयन गर्दै त्यसलाई निरन्तरता दिनेछु ।
३) विश्वभर छरिएका नेपालीमार्फत् नेपालका पर्यटकीय आकर्षण र गन्तव्यको प्रचारप्रसार गर्न विशेष योजना ल्याउनेछु । नेपालमा पर्यटन क्षेत्रमा लगानी गर्न गैरआवासीय नेपालीलाई प्रोत्साहित गर्नुका साथै त्यसअनुकूल वातावरण तथा नीतिका निम्ति पहल गर्नेछु । सरकारले अघि सारेको नेपाल ‘भ्रमण वर्ष–२०२०’ को सफलताका लागि सिंगो गैरआवासीय नेपालीको शक्ति र सञ्जाल परिचालन गर्न जुट्नेछु ।
४) सामाजिक तथा परोपकारी कामलाई अगाडि बढाउन भिजन–२०२० ले कल्पना गरेको एनआरएनए फाउन्डेसन विस्तार गरी सोहीमार्फत् एनआरएनहरुलाई सहभागी गराउनेछु ।
५) सुरक्षित र सम्मानपूर्ण वैदेशिक रोजगारीका लागि विद्यमान समस्या र समाधानका उपायबारे श्वेतपत्र तयार गरी त्यसैका आधारमा नेपाल सरकारसँगको समन्वयमा कार्ययोजना लागू गर्नेछु ।
६) वैदेशिक रोजगारीमा जानुअघि नै सीपयुक्त बनाई अन्तर्रा्िष्ट्रय श्रमबजारमा नेपाली जनशक्तिको सेवा सुविधा र मर्यादा अभिवृद्धिका प्रभावकारी कार्यक्रम नेपाल सरकारसँगको समन्वयमा कार्यान्वयन गर्नेछु ।
७) विदेशमा समस्यामा पर्न सक्ने नेपालीको उद्धार र राहतका लागि नेपाल सरकारसँग समन्वय गरेर वैदेशिक रोजगार राहत कोष वृद्धिमा लाग्नेछु ।
८) संविधानअनुसार गैरआवासीय नेपाली नागरिकता पाउने अधिकार शीघ्र कार्यान्वयनका लागि विशेष पहल गर्नेछु ।
९) विदेशमा रहेका नेपालीको मतदानको अधिकारसम्बन्धी व्यवस्थाको व्यावहारिक कार्यान्वयनमा लागिपर्नेछु ।
१०) संसारका कुनै पनि मुलुकमा रहेका हरेक गैरआवासीय नेपाली संघमा आबद्ध हुन न्यूनतम शुल्क वा निःशुल्क सदस्यता पञ्जीकरणका लागि पहल गर्नेछु । विश्वका जोकोही नेपालीले गर्वसाथ यो संस्था मेरो हो भनेर आबद्ध हुन चाहने गरी संरचना सञ्जाल र छवि निर्माणमा जुट्नेछु ।
११) नयाँ पुस्ताका गैरआवासीय नेपालीलाई संघका गतिविधिमा आकर्षित गर्दै स्वदेशसँगको सम्बन्धलाई कसिलो बनाउन विशेष ध्यान दिनेछु । साथै, त्यो पुस्ताको स्थानीय राजनीतिक, व्यावसायिक र सामाजिक क्षेत्रमा सहभागिता बढाउनेतर्फ पनि मेरो ध्यान रहनेछ ।
१२) संघमा महिलाको उपस्थिति, सहभागिता र नेतृत्वलाई व्यापक र सशक्त बनाउन विशेष अभियान सञ्चालन गरिनेछ ।
१३) संघको विधि, विधान र संस्थागत प्रक्रियाहरूलाई अनुशरण गर्ने गराउनेछु । सचिवायलको प्रभावकारिता र क्रियाशीलतामा ध्यान दिनेछु ।
१४) हरेक गैरआवासीय नेपालीको समान भूमिकालाई स्थापित गर्न नेतृत्व चयनका क्रममा अनलाइन भोटिङ प्रणालीबारे सम्भाव्यताको खोजी गरिनेछ ।
१५) संघको समयसापेक्ष विकास गर्न ‘भिजन २०२०’ को प्रस्ताव कार्यान्वयनको पक्षमा दृढ रहँदै यसलाई सफल बनाउन विशेष सक्रिय रहनेछु । साथै, संघको आर्थिक र सैद्धान्तिक स्थायित्व कायम गर्न विभिन्न कार्यक्रमहरु ल्याउनेछु ।
१६) संघका चालू परियोजनाको निरन्तरता, समापन र हस्तान्तरणलाई उच्च प्राथमिकतामा राख्नेछु ।
१७) संघले आफ्नो मूल्य, मान्यता र परिकल्पनामा रहेर अगाडि बढाउन खोजेका परियोजनामा हाम्रो मात्र स्रोत–साधनले नपुग्ने भएमा अन्तर्रा्िष्ट्रय संघसंस्थाहरुसँग सहकार्य गरिनेछ ।
१८) समान हक, हित र अधिकारका लागि संघर्षरत भूतपूर्व ब्रिटिस गोर्खाहरुको मागको पक्षमा उभिनेछु ।
१९) गैरआवासीय नेपालीका समस्या, चासो र सरोकारलाई उच्चस्तरबाट सम्बोधन गर्न नेपालको राजनीतिक नेतृत्वसँग नियमित सम्पर्क र प्रभावकारी समन्वयका निम्ति स्थायी संयन्त्र स्थापनाका लागि प्रयासरत रहनेछु ।
को हुन कुमार पन्त ?
सन् २००४ मा एनआरएन अभियानमा संलग्न भएका उनी अर्को वर्ष जर्मनीको हिस्सेन क्षेत्रका संयोजक भए ।
सन् २००९–२०११ मा अन्तराष्ट्रिय समन्वय परिषद (आईसीसी) सदस्य भएसँगै युरोप क्षेत्रको संयोजकको जिम्मेवारी वहन गर्न पुगे ।
सन् २०१३–२०१५ मा महासचिव भए र २०१५ यता दुई कार्यकाल आईसीसी उपाध्यक्षको जिम्मेवारीमा छन । सन् १९७६ मा गोर्खाको फुजेलमा जन्मिएका उनी विद्यार्थीका रुपमा सन् १९९९ मा जर्मनी गएका थिए । समाजशास्त्रमा स्नातक पन्त जर्मनीको फ्र्यांकफर्टमा बस्छन ।
उनी गैरआवासीय नेपाली संघ (एनआरएनए) अन्तराष्ट्रिय समन्वय परिषद् (आईसीसी) का उपाध्यक्ष हुन । उपाध्यक्षमा यो उनको दोस्रो कार्यकाल हो ।
उनको जर्मनी लगायत युरोपका विभिन्न देशमा होटलहरुमा लगानी छ । नेपालमा जलविद्युत परियोजना, बैंकिङ, रेमिट्यान्स, रियल स्टेट, सिमेन्ट उद्योग लगायतमा लगानी छ ।
२०७६ असोज २७ गते प्रकाशित
वि.सं.२०७६ असोज २७ सोमवार २०:१७ मा प्रकाशित
