काठमाण्डौं । वैदेशिक रोजगार प्रवर्द्धन बोर्डले नयाँ वर्षमा कार्यान्वयनमा ल्याउने गरी वैदेशिक रोजगारमा जाने कामदारहरुको जीवन बीमा रकम वृद्धि गरेर १० लाख रुपैयाँ बनाउने निर्णय गरेको छ।
वैदेशिक रोजगार ऐन २०६४ को दफा २६ मा वैदेशिक रोजगारमा जाने कामदारको म्यादी जिवन बीमाको बीमांक रकम पाँच लाख रुपैयाँ तोकिएको छ। गएको माघ १४ गते वैदेशिक रोजगार प्रवर्द्धन केन्द्रले यस विषयमा छलफल गरी समिति गठन गरेको थियो।
चैत १७ गते बसेको बोर्डको बैठकले पाँच लाख रुपैयाँ रहँदै आएको बीमांक रकमलाई दोब्बर बनाउने निर्णय गरेको थियो। मृत्यु भएमा शव ल्याउने खर्चसहित १४ लाख पाइने बीमा गर्ने व्यक्तिले बीमावापत रकम सय प्रतिशत वृद्धिसहित प्राप्त गर्नेछन्। मृतकको हकमा बीमा गरेको कामदारले शव ल्याउने खर्च तथा काजकिरिया खर्चसमेत गरी १४ लाख बराबरको क्षतिपूर्ति दिने बोर्डले जनाएको छ।
२५ चैत २०७२, ९.००
वि.सं.२०७२ चैत २५ बिहीवार ११:०५ मा प्रकाशित
