काठमाडौं । उपभोक्ताको ढाड सेकिने गरी मासुजन्य पदार्थमा मूल्य वृद्धि भएको छ । खसीको मासु भन्दा कुखुराको मासुमा अप्रत्यासित मूल्यवृद्धि भएको हो ।
केही महिनादेखि खसीको मासुको मूल्यमा वृद्धि भइरहेको छ । यो सातादेखि कुखुराको मासुको मूल्य पनि बढेको छ । केही साताअघि कुखुराको मासु प्रतिकिलो २ सय ७० रुपैयाँ थियो ।
अहिले मूल्य ह्वात्तै बढेर ४ सय रुपैयाँ पुगेको छ । मासुको मूल्यवृद्धिसँगै ग्राहक दैनिक ३० प्रतिशत घटेका छन् । आइकालु मिट सेन्टरका संचालन बल्लु बलराम खड्गी मूल्यबढेपछि ग्राहक घटेको बताउनुहुन्छ ।
मासुको मूल्य हरेक साता बढ्न थालेपछि उपभोक्ता किन्नै नसक्ने अवस्थामा पुगेका छन् । ‘मासु पहिला सातामा दुई, तीन पटक नै खाइन्थ्यो तर अहिले सातामा एक छाक पनि नसकिने अवस्था छ’ उपभोक्ता श्याम खड्काको गुनासो छ ।
बजार अनुगमन नहुँदा मंसिर, पुष र माघमा मासुको मूल्य मनलाग्दी बढेको छ र उपभोक्ताको भान्सामा मासुका परिकार घट्दो छ ।
वि.सं.२०७६ माघ २० सोमवार २०:३७ मा प्रकाशित
