काठमाडौं । छिमेकि देश भारतले यात्रामा प्रतिबन्ध लगाउने तयारी गरेको छ । १५ अप्रिल सम्ममा सबै भिसा निलम्बन गरी यात्रा प्रतिबन्ध गरिने भारत सरकारले जनाएको छ ।
राजनीतिक, सरकारी, संयुक्त राष्ट्रसंघ, अन्तराष्ट्रिय संस्था, इम्प्लोइमेन्ट र प्रोजेक्ट भिसा बाहेक अन्य भिसा निलम्बन गरिने बताइएको छ । कोरोना भाइरसको संक्रमण रोक्नका लागि भारतले सबै भिसा निलम्बन गर्ने निर्णय गरेको हो ।
कोरोना भाइरसको प्रकोपका कारण १५ अप्रिल पछि भारत जाने यात्रुहरुलाई १४ दिन क्वारेन्टाइनमा राखिने निर्णय समेत भारत सरकारले गरेको छ । स्वास्थ्यमन्त्री डा.हर्ष बर्धनको अध्यक्षमा बसेको बैठकले कोभिड १९ को संक्रमण फैलिनबाट रोक्न आवश्यक कदम चाल्ने निर्णय गरेको बताइएको छ ।
ओसीआई कार्ड भएका (प्रवासी भारतीय नागरिक) लाई दिइने भिसा मुक्त यात्राको सुविधा पनि १५ अप्रिल २०२० सम्म रोकिएको छ । यो १३ मार्च अर्थात भोलि मध्यरातबाट लागू हुनेछ । १५ अप्रिलपछि चीन, इटली, इरान, कोरिया, फ्रान्स, स्पेन र जर्मनीबाट भारत आउने सबै यात्रुलाई १४ दिन क्वारेन्टाइनमा राखिने र यसमा भारतीय नागरिक पनि पर्ने बताइएको छ ।
वि.सं.२०७६ फागुन २९ बिहीवार ११:५९ मा प्रकाशित
