काठमाडौं । राष्ट्रिय वाणिज्य बैंकले विश्वव्यापी रुपमा फैलिरहेको कोरोना भाइरस (कोभिड( १९)को संक्रमण रोकथाम र जोखिम न्यूनिकरणका लागि नेपाल सरकारलाई एक करोड ५० लाख रुपैयाँ सहयोग गर्ने भएको छ ।
मंगलबार बसेको सञ्चालक समितिको बैंठकले एक करोड ५० लाख रुपैयाँ आर्थिक सहयोग गर्ने निर्णय गरेको बैंकका प्रमुख कार्यकारी अधिकृत किरणकुमार श्रेष्ठले जानकारी दिए ।
मानवीय विपदको घडीमा देशमा कोरोना भाइरस संक्रमणको सम्भावित जोखिम, रोकथाम र नियन्त्रण गर्न सरकारले गरेको पहलकदमीलाई साथ दिन उक्त रकम सहयोग गर्न लागेको श्रेष्ठले जनाए ।
कोरोनाको जोखिम न्यूनीकरण तथा व्यवस्थापनका लागि बैंकबाट संस्थागत सामाजिक उत्तरदायित्वअन्तर्गत सरकारले निर्धारण गरेको कोषमा जम्मा हुने गरी उक्त रकम प्रदान गरिने भएको हो ।
वि.सं.२०७६ चैत ११ मंगलवार १८:४७ मा प्रकाशित