काठमाण्डौं । बागलुङ बजारवासीलाई लक्षित गरी यातायात व्यवसायीहरुले विद्युतीय रिक्सा सञ्चालनमा ल्याएका छन् । दैनिक पाँचवटा रिक्साले सर्वसाधारण यात्रुलाई सेवा दिइरहेका छन् ।
बागलुङ कालिका भगवती यातायात प्रालिको पहलमा तीन लाख मूल्य पर्ने विद्युतीय रिक्सा सञ्चालनमा ल्याइएको छ ।
छजना यात्रु बोक्ने क्षमताको रिक्सामा सामान पनि ढुवानी गर्न सकिने व्यवस्था छ । रिक्सा सञ्चालनमा आएसँगै जरुरी कामका लागि लामो पैदल यात्रा गर्नुपर्ने झन्झटबाट यात्रुले मुक्ति पाएका छन् ।
बजार क्षेत्रमा प्रतियात्रु २० रुपैयाँ र अलि लामो दूरीमा ५० रुपैयाँ भाडा लिने गरेको चालक बताउँछन् । ट्राफिक प्रहरीले ‘रुट परमिट’ लिएरमात्र रिक्सा सञ्चालनमा ल्याउन आग्रह गरेपछि त्यसको प्रक्रिया अघि बढेको छ । रिक्सालाई यातायात व्यवस्था कार्यालयमा दर्ता गरिने जनाइएको छ ।
एउटा रिक्साले अहिले दैनिक दुई हजारसम्म कमाइ गरेको छ । रिक्साले व्यवसायी र चालकको आयआर्जन पनि बढाएको छ ।
प्रकाशितः २०७३ जेठ १३
वि.सं.२०७३ जेठ १३ बिहीवार १३:२७ मा प्रकाशित
