काठमाडौं । चालु आर्थिक वर्षको पछिल्लो आठ महिनामा १८ करोड ९४ लाख ६४ हजार रुपैयाँ बराबरको सुनका गहना निर्यात भएको भएको छ ।चालु आर्थिक वर्षकै सुरुवातदेखि नेपालबाट सुनका गरगहना निर्यात हुन थालेको हो ।
निर्यात सुरु भएको आठ महिनामा १८ करोड ९४ लाख ६४ हजार रुपैयाँ बराबरको गहना निर्यात भएको हो । भंसार विभागले सार्वजनिक गरेको फागुनमसान्तसम्मको तथ्याङ्कले यस्तो देखाएको हो ।
नेपालबाट अष्ट्रेलिया, हङकङ, अमेरिका लगायतका देशहरुमा सुनका गरगहनाको निर्यात हुने गरेको छ । यी देशहरुमध्ये सबैभन्दा बढी अमेरिकामा निर्यात भएको विभागले जनाएको छ । पछिल्लो आठ महिनासम्म अमेरिकामा १२ करोड २१ लाख ६१ हजार रुपैयाँ बराबरको गहना निर्यात भएको छ ।
अमेरिकापछि अष्ट्रेलियामा बढी गहना निर्यात हुने गरेको तथ्याङ्कले देखाएको छ । फागुनमसान्तसम्ममा अष्ट्रेलियामा २ करोड १ लाख ६४ हजार रुपैयाँ बराबरको सुनका गहना निर्यात भएको छ ।
त्यसैगरि बढी गहना निर्यात हुने तेस्रो मुलुक हङकङमा पछिल्लो आठ महिनामा ४ करोड ७१ लाख ३९ हजार रुपैयाँ बराबरको गहना निर्यात भएको विभागले जनाएको छ ।
विभागका अनुसार पछिल्लो समयमा नेपालीहरुको बसोवास बढी भएका मुलुकहरुमा गहना निर्यात हुने गरेको छ । विशेषगरि ति देहरुमा नेपाली मौलिक गरगहनाको निर्यात भएको विभागले जनाएको छ ।
माघ महिनासम्म भने १५ करोड ६७ लाख ६९ हजार रुपैयाँ बराबरका गरगहना निर्यात भएको थियो । माघमसान्तदेखि फागुन अन्त्यसम्मको तुलनमा ३ करोड २६ लाख ९५ हजार रुपैयाँ गहना निर्यात बढेको विभागले जनाएको छ ।
चालु आर्थिक वर्षको पहिलो महिना (साउन) मा एक करोड ७३ लाख, भदौमा ८९ लाख, असोजमा २ करोड ४८ लाख, कात्तिक १ करोड ४२ लाख, मंसिरमा ४९ लाख, र माघ महिनामा ३ करोड ३० लाख रुपैयाँ बराबरको सुनका गरगहना निर्यात भएको विभागले जनाएको छ ।
वि.सं.२०७७ चैत ९ सोमवार १३:२६ मा प्रकाशित
